సమస్యలను పరిష్కరించినప్పుడే మంచి ఫలితాలు…ఇన్ని సవాళ్లు ఇదే మొదటి సారి:ఏపీ సీఎం చంద్రబాబు

సంపద సృష్టించి పేద ప్రజలకు పంచాలనేదే తమ ఉద్దేశమని ఏపీ సీఎం చంద్రబాబు మరోసారి స్పష్టం చేశారు. సచివాలయంలో ఏపీ సీఎం అధ్యక్షతన మంత్రులు, వివిధ శాఖల కార్యదర్శుల సమావేశం జరిగింది. ఈ సందర్భంగా పలు అంశాలపై అధికారులకు సీఎం చంద్రబాబు కీలక సూచనలు చేశారు. గత ఐదేళ్ల విధ్వంస పాలనతో వెనుకబడ్డామని ఒక్కో సమస్యను అధిగమిస్తూ ముందుకుసాగుతున్నామన్నారు. ప్రభుత్వం ఏర్పడిన ఈ 6నెలల కాలంలోనే 12.94 శాతం గ్రోత్ రేట్ కనబడినట్లు తెలిపారు. ఉన్న సమస్యలపై త్వరగా నిర్ణయం తీసుకోవాలని ఫైళ్ల పరిశీలనలో వేగం పెంచాలని పేర్కొన్నారు. సమస్యలను పరిష్కరించినప్పుడే మంచి ఫలితాలొస్తాయని తెలిపారు. ఇక రేపటికి ప్రభుత్వం ఏర్పడి సరిగ్గా 9నెలలవుతుందని గుర్తుచేశారు. గత వైసీపీ పాలనను వద్దని ప్రజలు భారీ మద్దతుతో మనకు అధికారం ఇచ్చారు. ప్రభుత్వం ఏర్పడినప్పుడల్లా ఒక సవాలు ఉండేదని అయితే ఇప్పుడు ఇన్ని సవాళ్లను ఎదుర్కోవడం ఇది మొదటి సారి అని అన్నారు. ఇప్పటికి ఏడు శ్వేత పత్రాలు విడుదల చేశామన్నారు. స్వర్ణాంధ్ర విజన్-2047 ద్వారా లక్ష్యాలను నిర్దేశించుకున్నాం. 15 శాతం గ్రోత్ రేట్ తో మన ఆర్థిక వ్యవస్థ సుస్థిరం కావాలి. అప్పులు కూడా తీర్చాలి. పాలనా వ్యవస్థను కూడా గాడిలో పెట్టాల్సిన అవసరం ఉందని పేర్కొన్నారు. వివిధ అంశాలపై మంత్రులు, అధికారులకు దిశా నిర్దేశం చేశారు.