భారత పాకిస్తాన్ లో మధ్య క్రీడా ద్వైపాక్షిక సంబంధాలపై కేంద్ర క్రీడా మంత్రిత్వ శాఖ కీలక ప్రకటన చేసింది. దీని ప్రకారం ద్వైపాక్షిక సిరీస్ లు ఉండబోవని స్పష్టం చేసింది. తటస్థ వేదికలపై కూడా ఈ సిరీస్ లు ఉండవని తెలిపింది. అయితే ఆసియా కప్ లో పాల్గొనడం పట్ల వెసులుబాటు కల్పించింది. మిగిలిన జట్లు కూడా పాల్గొనే టోర్నీ కావడంతో ఆసియా కప్ లో పాల్గొనకుండా ఆపబోమని పేర్కొంది. పాకిస్థాన్ తో ఇంటర్నేషనల్ స్పోర్ట్స్ పై కొత్త క్రీడా విధానాన్ని క్రీడా మంత్రిత్వ శాఖ ఆవిష్కరించింది. భారత క్రీడాకారులు పాకిస్థాన్ లో పర్యటించకుండా నిషేధం విధించినట్లు కేంద్ర క్రీడా మంత్రిత్వ శాఖ వర్గాలు తెలిపాయి. ఈ విధానం వెంటనే అమల్లోకి వస్తుందని తెలిపాయి. వేరే దేశాలు కలిసి పాల్గొనే టోర్నీలలో పాకిస్థాన్ లో భారత్ పర్యటించాల్సి వచ్చినప్పుడు ఆలోచించి నిర్ణయం తీసుకుంటామని వివరించింది.
