ఎస్సీ వర్గీకరణ కోసం సీఎం చంద్రబాబు, మంద కృష్ణ ఎంతో కృషి చేశారు :డిప్యూటీ సీఎం పవన్ కళ్యాణ్

ఏపీ అసెంబ్లీ సమావేశాల్లో ఇవాళ ఎస్సీ వర్గీకరణ బిల్లుపై చర్చ జరిగింది.ఈ సందర్భంగా డిప్యూటీ సీఎం పవన్ కళ్యాణ్ మాట్లాడారు.ఎస్సీ వర్గీకరణలో ముఖ్యమంత్రి చంద్రబాబు, ఎమ్మార్పీఎస్ నేత మంద కృష్ణ మాదిగ కీలక పాత్ర పోషించారని అన్నారు.మంద కృష్ణ మాదిగ ప్రారంభించిన ఉద్యమాన్ని చంద్రబాబు ముందుకు తీసుకెళ్లారని చెప్పారు.తాను కూడా ఈ విషయంలో ఆసక్తి చూపించానని,పలువురు దళిత మేధావులను కలసి చర్చించానని వెల్లడించారు.మాదిగలు,మాలలు రాష్ట్రానుసారం భిన్నంగా ఉన్నారని,ఈ నేపథ్యంలో వర్గీకరణ సమతుల్యంగా చేయాల్సిన అవసరం ఉందని పేర్కొన్నారు.కులం పేరును చివరన పెట్టుకోవడం మంద కృష్ణ మాదిగ సాహసోపేతమని అభివర్ణించారు.చంద్రబాబు నేతృత్వంలోని ఎన్డీయే ప్రభుత్వం తీసుకువచ్చిన బిల్లుకు జనసేన సంపూర్ణ మద్దతు ప్రకటిస్తున్నట్లు వెల్లడించారు.ఈ నిర్ణయం ఎస్సీ వర్గీకరణకు దోహదపడుతుందని అన్నారు.