గోషామహల్ ఎమ్మెల్యే, బీజేపీ సీనియర్ నేత రాజాసింగ్ మరోమారు సంచలన వ్యాఖ్యలు చేశారు. సొంత పార్టీ నేతలే తనపై కుట్ర చేస్తున్నారని, తనను జైలుకు పంపించే ప్రయత్నం చేశారని ఆరోపించారు.తనపై పీడీ యాక్ట్ పెట్టాలని పోలీసులకు సూచించారని వెల్లడించారు. ప్రస్తుతం అసెంబ్లీలో బడ్జెట్ సమావేశాలు జరుగుతున్నప్పటికీ రాజాసింగ్ హాజరుకాకపోవడం పార్టీ వర్గాల్లో అనేక సందేహాలకు కారణమైంది.అయితే బీజేపీ తెలంగాణ అధ్యక్షుడి నియామకంపై పార్టీ అధిష్టానం చర్చలు జరుపుతున్న సమయంలో రాజాసింగ్ తాజా వ్యాఖ్యలు చర్చనీయాంశంగా మారాయి.రాష్ట్ర అధ్యక్షుడి ఎంపికకు సంబంధించి కూడా కీలక వ్యాఖ్యలు చేసిన రాజాసింగ్, బీఆర్ఎస్, కాంగ్రెస్ నేతలతో కలిసే వారికంటే,నిజమైన బీజేపీ నేతకు అవకాశం ఇవ్వాలని డిమాండ్ చేశారు. రాష్ట్రంలో బీజేపీ ప్రభుత్వాన్ని ఏర్పాటు చేయాలంటే కార్యకర్తలకు నిబద్ధతతో పని చేసే నేతను అధ్యక్షుడిగా నియమించాల్సిన అవసరం ఉందని పేర్కొన్నారు.
