భారత్-ఇంగ్లాండ్ జట్ల మధ్య మూడు వన్డేల సిరీస్ లో భాగంగా నేడు కటక్ వేదికగా జరిగిన రెండో వన్డేలోనూ 6 వికెట్ల తేడాతో విజయం సాధించి సిరీస్ లో 2-0 ఆధిక్యంతో నిలవడమే కాక సిరీస్ ను మరో మ్యాచ్ మిగిలి ఉండగానే కైవసం చేసుకుంది. మ్యాచ్ లో టాస్ గెలిచి మొదట బ్యాటింగ్ ఎంచుకున్న ఇంగ్లండ్ జట్టు 49.5 ఓవర్లలో 304 పరుగులకు ఆలౌటయింది. జో రూట్ 69 (72; 6×4), డకెట్ 65 (56; 10×4) హాఫ్ సెంచరీలు సాధించారు. లివింగ్ స్టోన్ 41 (32; 2×4, 2×6), జాస్ బట్లర్ 34 (35; 2×4), హ్యారీ బ్రూక్ 31 (52; 3×4, 1×6) సాల్ట్ 26 (29; 2×4, 1×6) పరుగులు చేయడంతో ఇంగ్లాండ్ 300 మార్క్ దాటింది. భారత బౌలర్లలో రవీంద్ర జడేజా 3 వికెట్లు, షమీ, హార్షిత్ రాణా, హార్థిక్ పాండ్య, వరుణ్ చక్రవర్తి ఒక్కో వికెట్ చొప్పున పడగొట్టారు. ఇక లక్ష్య ఛేదనలో భారత్ ఎక్కడా తడబడలేదు. రోహిత్ శర్మ- శుభ్ మాన్ గిల్ 136 పరుగుల భాగస్వామ్యాన్ని అందించి శుభారంభం చేశారు. గత కొంత కాలంగా నిరాశ పరుస్తున్న రోహిత్ శర్మ 119 (90; 12×4, 7×6) సెంచరీతో సత్తా చాటాడు. భారీ షాట్లతో అభిమానులను అలరించాడు. శుభ్ మాన్ గిల్ 60 (52; 9×4, 1×6) హాఫ్ సెంచరీతో రాణించాడు. శ్రేయాస్ అయ్యర్ (44), అక్షర్ పటేల్ (41 నాటౌట్) కూడా ఆకట్టుకున్నారు. దీంతో ఈ సిరీస్ లో భారత్ మరో విజయాన్ని సాధించింది.
