ప్రతిష్టాత్మక గ్రాండ్ స్లామ్ వింబుల్డన్ టైటిల్ ను ఇటలీ టెన్నిస్ స్టార్ యానిక్ సినర్ కైవసం చేసుకున్నాడు. డిఫెండింగ్ ఛాంపియన్ కార్లోస్ అల్కరాస్ ఆధిపత్యానికి తెరదించుతూ తనదైన ఆటతీరుతో అదరగొట్టేసిన ప్రపంచ నెంబర్ వన్ సినర్ ఈ టోర్నీలో కొత్త ఛాంపియన్ గా నిలిచాడు. ఫైనల్లో టాప్ సీడ్ సినర్ 4-6, 6-4, 6-4, 6-4తో రెండోసీడ్ అల్కరాస్ పై విజయం సాధించాడు. ఫ్రెంచ్ ఓపెన్ ఫైనల్లో కార్లోస్ అల్కరాస్-యానిక్ సినర్ లు హోరాహోరీగా పోరాడిన సంగతి తెలిసిందే. ఈ టోర్నీలో మాత్రం సినర్ దూకుడు ముందు అల్కరాస్ పోరాటం సరిపోలేదు. దీంతో ఆల్ ఇంగ్లాండ్ క్లబ్లో హ్యాట్రిక్ సాధించాలనుకున్న స్పెయిన్ స్టార్ పై పూర్తి ఆధిపత్యం చాటుకుంటూ గ్రాస్ కోర్టులో యానిక్ సినర్ అదిరే విజయంతో వింబుల్డన్ టైటిల్ గెలిచాడు . గత రెండేళ్లలో అల్కరాస్ పై సినర్ కు ఇదే తొలి విజయం. అతడికిది నాలుగో గ్రాండ్ స్లామ్ టైటిల్. దీంతో ఫైనల్ చేరిన ప్రతిసారీ టైటిల్ గెలిచిన అల్కరాస్ రికార్డు కనుమరుగైంది.
