పవన్‌కల్యాణ్‌ హీరోగా సుజీత్‌ దర్శకత్వంలో తెరకెక్కుతోన్న చిత్రం ‘ఓజీ’. ప్రస్తుతం చిత్రీకరణ దశలో ఉంది. ఈ సినిమా అప్‌డేట్స్‌ కోసం ఎదురుచూస్తోన్న అభిమానులను ఉద్దేశించి తాజాగా నిర్మాణ సంస్థ డీవీవీ ఎంటర్‌టైన్‌మెంట్స్‌ పోస్ట్‌ పెట్టింది. ‘ఆయన్ని ఇబ్బంది పెట్టకండి’ అని విన్నపం చేసింది. ‘‘ఓజీ’పై మీరు చూపిస్తోన్న ప్రేమాభిమానాన్ని మా అదృష్టంగా భావిస్తున్నాం. మా చిత్రాన్ని మీ ముందుకు తీసుకువచ్చేందుకు నిరంతరం పనిచేస్తున్నాం. కానీ, పవన్‌కల్యాణ్‌ రాజకీయ సభలకు వెళ్లినప్పుడు, సమయం, సందర్భం చూడకుండా ఓజీ ఓజీ అని అరవడం, ఆయన్ని ఇబ్బందిపెట్టడం సరైన పద్ధతి కాదు. ఆంధ్రప్రదేశ్‌ ఉప ముఖ్యమంత్రి హోదాలో ఆ రాష్ట్ర అభివృద్ధి, భవిష్యత్తు కోసం ఆయన ఎంత కష్టపడుతున్నారో మనందరికీ తెలుసు. ఆ స్థానాన్ని, స్థాయిని గౌరవించడం మన బాధ్యత. కాబట్టి కొన్ని రోజులు ఓపికగా ఎదురుచూద్దాం’’ అని పేర్కొంది. జవహర్‌ బాబును పరామర్శించేందుకు నిన్న కడప రిమ్స్‌కు వెళ్లిన పవన్‌ ఫ్యాన్స్‌ ప్రవర్తనతో ఇబ్బందిపడ్డారు. ఆయన సీరియస్‌గా మాట్లాడుతున్న సమయంలో అభిమానులు ఓజీ ఓజీ అంటూ కేకలు వేశారు. దీనిపై ఆయన అసహనం వ్యక్తం చేశారు. ఈ క్రమంలోనే నిర్మాణ సంస్థ తాజాగా పోస్ట్‌ పెట్టింది.
Aaayanni Ibbandhi Pettakandraaa… Inkonchem time undhi…. Allaaadiddaam Theatres lo..#TheyCallHimOG #OG #FireStormIsComing pic.twitter.com/AjegAndqAh
— DVV Entertainment (@DVVMovies) December 28, 2024