వారానికి 4 వర్కింగ్ డేస్: బ్రిటన్ లోని 200 కంపెనీలు తాజాగా కీలక నిర్ణయం

వారానికి ఎన్ని గంటలు పనిచేయాలనే అంశంపై భారత్ లో భిన్న వాదనలు వినిపిస్తున్న నేపథ్యంలో బ్రిటన్లోని 200 కంపెనీలు తాజాగా కీలక నిర్ణయం తీసుకున్నాయి. ఎటువంటి జీతాల కటింగ్ లేకుండా పూర్తిగా నాలుగు పని దినాలను అమలు చేస్తున్నట్లు ప్రకటించాయి. ఈ మేరకు పలు మార్కెటింగ్, టెక్నాలజీ, ఛారిటీలు సహా 200 సంస్థలు ఈ విధానంలోకి మారినట్లు యూకే మీడియా కథనాలు వెలువడ్డాయి. ‘4 డే వీక్ ఫౌండేషన్’ చేసిన సర్వేలో భాగంగా ఈ విషయం వెల్లడైనట్లు ఆ కథనాలు తెలిపాయి. కాగా, ఈ నిర్ణయంతో ఆయా కంపెనీలలో పని చేస్తున్న సుమారు 5 వేల మంది ఉద్యోగులకు లబ్ధి చేకూరనుంది. ఈ సందర్భంగా ‘4 డే వీక్ ఫౌండేషన్’ డైరెక్టర్ జో రైల్ మాట్లాడుతూ “వారానికి ఐదు రోజుల పని దినాలు, 9 నుండి 5 వరకు జాబ్ అనేవి వందేళ్ల కిందటి విధానాలు. ప్రస్తుత అవసరాలకు ఇవి సరిపోవని మనం అప్డేట్ కావాల్సిన అవసరం ఉందని వివరించారు. వారానికి 4 రోజుల వర్కింగ్ డేస్ వలన ఉద్యోగులకు ఎక్కువ ఖాళీ సమయం దొరుకుతుంది. దానివల్ల వారికి ఫ్యామిలీతో సంతృప్తికర జీవితాన్ని గడపడానికి స్వేచ్ఛ లభిస్తుందన్నారు.