ప్రముఖ సోషల్ మీడియా యాప్ టిక్టాక్ కొనుగోలు అంశంపై ఇటీవల వస్తున్న వార్తలకు సంబంధించి స్పేస్ ఎక్స్‌ అధినేత ఎలాన్ మస్క్ స్పందించారు. దాన్ని కొనుగోలు చేయాలనే ఆసక్తి లేదని మస్క్ తెలియజేశారు. తనకు కంపెనీలను కొనుగోలు చేయడం కంటే నెలకొల్పడం అంటేనే ఎక్కువ ఇష్టమని ఒక కార్యక్రమంలో మాట్లాడుతూ మస్క్ పేర్కొన్నారు. అమెరికాలో నిషేధం పడే అవకాశం ఉన్న నేపథ్యంలో దాని నుండి తప్పించుకునేందుకు అమెరికాలోని టిక్టాక్ కార్యకలాపాలను ఎలాన్ మస్క్‌కు విక్రయించాలని సంస్థ యాజమాన్యం యోచిస్తున్నట్లు ఇటీవల ప్రచారం జరిగింది. గత నెలలో ఒక వీడియోలో ఆయన ఈ విషయాన్ని వెల్లడించినట్లు తెలుస్తోంది. ఇక ఇప్పటికే టిక్‌టాక్‌ను భారత్ సహా పలు దేశాలు నిషేధించిన విషయం తెలిసిందే. అమెరికాలోని కొన్ని రాష్ట్రాల్లో కూడా దీని వినియోగంపై ఆంక్షలు విధించారు. చైనా యాజమాన్యాన్ని వదులుకోకపోతే నిషేధం ఎదుర్కోవాల్సిందేనని అమెరికా ప్రతినిధుల సభ ఇటీవల తీర్మానించింది. టిక్ టాక్ పేరెంట్ కంపెనీ బైట్‌డ్యాన్స్‌కు అమెరికా సుప్రీం కోర్టు కూడా డెడ్‌లైన్ విధించింది. సంస్థ జాయింట్ వెంచర్‌లో అమెరికాకు సగం శాతం వాటా ఇస్తే దానికి ప్రయోజనం చేకూరేలా నిర్ణయం తీసుకుంటానని ట్రంప్ పలు మార్లు పేర్కొనడమే కాక అధికారంలోకి వచ్చిన తర్వాత 75 రోజుల్లోగా టిక్టాక్ ను అమ్మివేయాలంటూ ఎగ్జిక్యూటివ్ ఆర్డర్‌ పై కూడా సంతకం చేశారు.
Previous Articleఢిల్లీ ప్రజల పక్షాన మా పోరాటం కొనసాగుతుంది: రాహుల్ గాంధీ
Next Article కన్నప్ప నుండి రేపు ఫస్ట్ సింగిల్ విడుదల…!