ఇటీవల ఒక కేసులో మాజీ ఎమ్మెల్యే వైసీపీ నేత వల్లభనేని వంశీ అరెస్టయిన సంగతి తెలిసిందే. కాగా, నేడు వంశీని పరామర్శించేందుకు వైసీపీ అధినేత వైఎస్ జగన్ విజయవాడ సబ్ జైలుకు వెళ్లారు. ఆయనను కలిసి పరామర్శించిన అనంతరం జగన్ మీడియాతో మాట్లాడారు. రాష్ట్రంలో శాంతిభద్రతలు దిగజారిపోయాయని జగన్ ఆరోపించారు. రాష్ట్రంలో దిగజారిపోయిన లా అండ్ ఆర్డర్‌కు వల్లభనేని వంశీ అరెస్ట్ అద్దం పడుతోందని మండిపడ్డారు.వంశీ ఎలాంటి తప్పు చేయలేదని టీడీపీ ఆఫీసులో పనిచేసే సత్యవర్ధనే చెప్పారని వంశీపై తప్పుడు కేసులు పెట్టారని పేర్కొన్నారు . పట్టాభి రెచ్చగొట్టడం వల్లే గన్నవరం టీడీపీ ఆఫీసుపై దాడి జరిగిందని పట్టాభిని సీఎం చంద్రబాబే పంపించి గన్నవరంలో గొడవ సృష్టించారని ఆరోపించారు. అధికారం శాశ్వతం కాదని అన్యాయాలు చేసే వారిని బట్టలూడదీసి నిలబెడతానని జగన్ మండిపడ్డారు.
