అమెరికాలో ఉన్నత విద్యను అభ్యసించాలనే లక్ష్యంతో ఉన్న వేలాది మంది భారతీయ విద్యార్థుల్లో తీవ్ర అనిశ్చితి నెలకొంది.ఇందుకు కారణం,ఆప్షనల్ ప్రాక్టికల్ ట్రైనింగ్ (ఓపీటీ) ప్రోగ్రామ్‌ను రద్దు చేయాలని కోరుతూ అమెరికన్ కాంగ్రెస్‌లో తాజాగా ప్రవేశపెట్టిన “ఫెయిర్‌నెస్ ఫర్ హై స్కిల్డ్ అమెరికన్ యాక్ట్ – 2025” బిల్లు.ఈ పరిణామం వల్ల గత ఏడాదితో పోలిస్తే ఈ ఏడాది మార్చి నాటికి అమెరికాలో భారతీయ విద్యార్థుల సంఖ్య 28 శాతం తగ్గింది.సైన్స్, టెక్నాలజీ, ఇంజినీరింగ్, మ్యాథ్స్ (స్టెమ్) కోర్సులు చేసే విద్యార్థులు ఓపీటీ ద్వారా మూడేళ్లపాటు అక్కడ ఉద్యోగాల కోసం ఉండే వీలుంది.కానీ ప్రస్తుత బిల్లు ఆ అవకాశాన్ని తిరస్కరిస్తుంది.2024 జులైలో 3.48 లక్షల మంది భారతీయ విద్యార్థులు అమెరికాలో చదువుతున్నా, 2024 మార్చి నాటికి వారి సంఖ్య 2.55 లక్షలకు పడిపోయింది.వీసా జారీ ప్రక్రియలో అనిశ్చితి,ట్యూషన్ ఖర్చుల పెరుగుదల,రూపాయి విలువ తగ్గుదల కూడా ఈ పడిపోయే సంఖ్యకు కారణంగా సూచించారు.
ఓపీటీ రద్దయితే విద్యార్థుల ఉద్యోగ భవిష్యత్తు, ఆర్థిక స్థిరత్వంపై తీవ్ర ప్రభావం చూపుతుందని స్టెప్ గ్లోబల్‌ సీఓఓ సిద్ధార్థ్ అయ్యర్ తెలిపారు. అమెరికాలో చదువు ఖర్చులు వార్షికంగా 25,000–45,000 డాలర్ల వరకు ఉండటంతో భారతీయ కుటుంబాలపై తీవ్ర భారం పడుతోందని అన్నారు.ట్రంప్ ప్రభుత్వ వలస విధానాలపై అమెరికా విద్యా రంగం కోర్టును ఆశ్రయించింది.వీసాల రద్దు,అరెస్టులు,విద్యాసంస్థలపై బెదిరింపులు వంటివి విద్యా వాతావరణాన్ని భయంకరంగా మార్చాయని అమెరికన్ యూనివర్సిటీలు అభిప్రాయపడుతున్నాయి.ప్రెసిడెంట్స్ అలయెన్స్ ఆన్ హయ్యర్ ఎడ్యుకేషన్ అండ్ ఇమిగ్రేషన్ సహా 86 సంస్థలు ట్రంప్ విధానాలకు వ్యతిరేకంగా న్యాయపోరాటం చేస్తున్నారు.విద్యార్థుల భవిష్యత్తు కోసం ఈ విషయంపై స్పష్టత మరియు సంరక్షణ అవసరమని స్పష్టం అవుతోంది.