7 మంది ఎంపీల నాయకత్వంలో విదేశాలకు బృందాలు… భారత్ కీలక నిర్ణయం

పాకిస్థాన్ ఉగ్ర కుట్రలకు ఇటీవలే ‘ఆపరేషన్ సిందూర్’ తో తగిన గుణపాఠం చెప్పిన భారత్ అంతర్జాతీయంగా కూడా పాక్ దుష్టబుద్దిని ఎండగట్టేందుకు చర్యలు తీసుకుంటోంది. పాకిస్థాన్ ఉగ్ర కుట్రలను ప్రపంచ దేశాలకు వివరించడం కోసం 7 అఖిల పక్ష టీమ్ లను ఏర్పాటు చేసింది. ఆ టీమ్ లకు నాయకత్వం వహించే 7 మంది ఎంపీలను కూడా నేడు ప్రకటించింది. శశిథరూర్ -కాంగ్రెస్, రవిశంకర్ ప్రసాద్-బీజేపీ, బైజయంత్ పాండాబీజేపీ, సంజయ్ కుమార్ ఝా-జేడీయూ, కనిమొళి-డీఎంకే, సుప్రియా సూలే- ఎన్సీపీ -ఎస్పీ, శ్రీకాంత్ శిందే- శివసేన. ఈ బృందాలకు ఈ ఏడుగురు నాయకత్వం వహించనున్నారు.
మొత్తంగా 7 గ్రూపులు 10రోజుల వ్యవధిలో 5 దేశాలకు వెళ్తాయి. ఈ విషయంపై విపక్షాలతో చర్చలు జరిపి సభ్యులను ఎంపిక చేసింది. పాకిస్థాన్ ఉగ్రవాదాన్ని ప్రోత్సహించడం, ఇటీవల జరిగిన పరిణామాలు, ఉగ్రవాదంపై భారత్ పోరాడుతున్న తీరు తదితర అంశాలను విదేశాలకు వివరించనున్నట్లు తెలుస్తోంది.