‘డేవిడ్ రెడ్డి’ గా పవర్ ఫుల్ పాత్రలో మంచు మనోజ్

డిఫరెంట్ కంటెంట్ ఉన్న సినిమాలతో ప్రేక్షకులను అలరించే విలక్షణ నటుడు మంచు మనోజ్ ఒక భారీ చారిత్రక యాక్షన్ మూవీతో ప్రేక్షకుల ముందుకు రాబోతున్నారు. తన 21వ సినిమాగా రానున్న దీనికి ‘డేవిడ్ రెడ్డి’ అనే టైటిల్‌ ను ప్రకటించారు. ఇందులో మనోజ్ ఇదివరకుచూడని శక్తిమంతమైన పాత్రలో కనిపించనున్నారు. సినీ పరిశ్రమలోకి అడుగుపెట్టి 21 ఏళ్లు పూర్తయిన ప్రత్యేక సందర్భాన్ని పురస్కరించుకుని ఆయన ఈ కొత్త ప్రాజెక్ట్‌ను ప్రకటించారు. ఈ చిత్రానికి సంబంధించిన ఫస్ట్ లుక్ పోస్టర్‌ ను కూడా విడుదల చేశారు. ఈ సినిమా 1897 నుంచి 1922 మధ్య కాలంలో బ్రిటిష్ పాలనకు వ్యతిరేకంగా జరిగిన పోరాటం నేపథ్యంలో సాగుతుందని చిత్రబృందం తెలిపింది. బ్రిటిష్ సామ్రాజ్యాన్నే గడగడలాడించిన ఒక సామాన్య యోధుడి సాహసగాథగా ‘డేవిడ్ రెడ్డి’ని తెరకెక్కించనున్నారు. “మద్రాస్ ప్రెసిడెన్సీలో పుట్టి, ఢిల్లీలో పెరిగి, ఇప్పుడు బ్రిటిష్ సామ్రాజ్యాన్ని కదిలిస్తున్నాడు” అనే ట్యాగ్‌లైన్ సినిమా కథాంశంపై మరింత ఆసక్తిని పెంచుతోంది. హనుమ రెడ్డి యక్కంటి దర్శకత్వం వహిస్తుండగా, మోటూకూరి భరత్, నల్లగంగుల వెంకట్ రెడ్డి నిర్మాతలుగా వ్యవహరిస్తున్నారు.