ఆమ్ ఆద్మీ పార్టీపై కాంగ్రెస్ కీలక నేత, కాంగ్రెస్ పార్టీ ట్రెజరర్ అజయ్ మాకెన్ విమర్శలు చేశారు. 40 రోజులపాటు 2013లో ఆ పార్టీకి మద్దతివ్వడం కాంగ్రెస్ చేసిన అతిపెద్ద తప్పని పేర్కొన్నారు. ఆ కారణంగా ఢిల్లీలో కాంగ్రెస్ బలహీనపడిందని అభిప్రాయపడ్డారు. ఆ పొరపాటును ఇప్పటికైనా సరిచేసుకోవాల్సిన అవసరం ఉందని అన్నారు. ఇది తన అభిప్రాయమేనని అన్నారు. ఢిల్లీ కాంగ్రెస్ తాజాగా 12 అంశాలతో ఒక వైట్ పేపర్ విడుదల చేసింది. ఢిల్లీ లో పొల్యూషన్ కంట్రోల్, లా అండ్ ఆర్డర్, మౌలిక వసతుల కల్పనలో విఫలమయ్యాయని బీజేపీ, ఆమ్ ఆద్మీ పార్టీలపై అజయ్ మాకెన్ విమర్శించారు. జన్ లోక్ పాల్ అంశంలో ఆప్ తీరుని ఆక్షేపించారు. ఢిల్లీని లండన్ లా అభివృద్ధి చేస్తామన్నారని అయితే కాలుష్యంలో అగ్రస్థానంలో నిలిపారని దుయ్యబట్టారు.
