ఇజ్రాయెల్‌- హమాస్ మధ్య కుదిరిన కాల్పుల విరమణ ఒప్పందం అమల్లోకి వచ్చిన సంగతి తెలిసిందే.దీనికి అనుగుణంగా తమ చెరలో ఉన్న ఇజ్రాయెల్‌కు చెందిన నలుగురు మహిళా సైనికులను హమాస్ నిన్న విడుదల చేసింది.ఆ నలుగురిని మిలిటరీ యూనిఫామ్‌లో తీసుకొచ్చి రెడ్‌క్రాస్‌కు అప్పగించింది.అనంతరం వారిని ఇజ్రాయెల్‌కు తీసుకెళ్లారు.వీరిని విడుదల చేసినందుకు గానూ ఇజ్రాయెల్‌ సైతం 100కు పైగా పాలస్తీనియన్లను విడిచిపెట్టింది.
తాజాగా విడుదలైన మహిళా సైనికులను 2023 అక్టోబర్‌ 7న గాజా సరిహద్దుకు సమీపంలోని వహల్‌ ఓజ్‌ మిలిటరీ బేస్‌ నుండి హమాస్ బంధించి తీసుకెళ్లింది.అప్పటి నుండి 477 రోజులుగా ఆ మహిళా సైనికులు హమాస్ చెరలోనే ఉన్నారు.అయితే కాల్పుల విరమణ ఒప్పందం అమల్లోకి వచ్చిన తొలిరోజు గాజా నుండి ముగ్గురు ఇజ్రాయెలీ బందీలను హమాస్ విడుదల చేసిన విషయం తెలిసిందే.ప్రతిగా ఇజ్రాయెల్‌ కూడా తమ జైళ్లలో ఉన్న 100 మందికిపైగా పాలస్తీనియనన్లకు విముక్తి కల్పించి వారిని రెడ్‌క్రాస్‌ సంస్థకు అప్పగించింది. కాగా, 42 రోజుల తొలి దశ కాల్పుల విరమణ ఒప్పందంలో భాగంగా తమ చెరలో ఉన్న 2,000 మందిని ఇజ్రాయెల్‌ వదిలిపెట్టనుండగా.. హమాస్ సైతం తమ చెరలో ఉన్న 94 మంది బందీల్లో 33 మందికి విముక్తి కల్పించనుంది.