ఉత్తరాఖండ్ లో నేటి నుండి యూనిఫాం సివిల్ కోడ్ (యూసీసీ) అమలులోకి వచ్చింది. ఈ మేరకు ఆ రాష్ట్ర సీఎం పుష్కర్ సింగ్ థామి తాజాగా కీలక ప్రకటన చేశారు. దేశంలోనే యూసీసీ అమలు చేసిన తొలి రాష్ట్రంగా ఉత్తరాఖండ్ నిలుస్తుందని సీఎం పేర్కొన్నారు.రాష్ట్రంలో యూసీసీ అమలుకు అన్ని ఏర్పాట్లు పూర్తయ్యాయని ఈ చట్టం అమలుపై సంబంధిత అధికారులకు శిక్షణ ఇచ్చినట్లు తెలిపారు. యూసీసీ అమలుతో సమాజంలో చాలా విషయాల్లో పౌరులందరికీ సమానమైన హక్కులు, బాధ్యతలు దక్కేలా చేస్తున్నట్లు పేర్కొన్నారు.
ముందుగా యూసీసీ ముసాయిదా రూపకల్పనకు ప్రభుత్వం 2022 మే లో సుప్రీంకోర్టు రిటైర్డ్ జడ్జి జస్టిస్ రంజనా ప్రకాశ్ దేశాయ్ నేతృత్వంలోని నిపుణుల కమిటీని ఏర్పాటు చేసింది. సుదీర్ఘ కసరత్తు తరువాత కమిటీ ముసాయిదా బిల్లును రాష్ట్ర ప్రభుత్వానికి సమర్పించగా, గత ఏడాది ఫిబ్రవరి 7న అసెంబ్లీ ఆమోదించింది. నెల రోజుల తర్వాత ఈ బిల్లుకు రాష్ట్రపతి ద్రౌపది ముర్ము ఆమోదం లభించింది.
