ఇటీవల కాలంలో కార్పొరేట్ దిగ్గజాలు ఉద్యోగుల పని గంటల పెంపుకు సంబంధించి చేస్తున్న వ్యాఖ్యల గురించి తెలిసిందే. ఆ వ్యాఖ్యలపై దేశ వ్యాప్తంగా చర్చ జరుగుతున్న నేపథ్యంలో కేంద్ర ప్రభుత్వం దీనిపై మరోసారి స్పష్టత ఇచ్చింది. పని గంటలను వారానికి 70 లేదా 90 గంటలకు పెంచే ప్రతిపాదన ఏదీ తమ పరిశీలనలో లేదని స్పష్టం చేసింది. కేంద్ర కార్మిక, ఉపాధి కల్పన సహాయ మంత్రి శోభా కరంద్లాజే ఈమేరకు లోక్ సభలో లిఖితపూర్వక సమాధానం ఇచ్చారు. కార్మికుల అంశం ఉమ్మడి జాబితాలో ఉందని, ఆ చట్టాల అమలును రాష్ట్ర ప్రభుత్వాలు, కేంద్ర ప్రభుత్వం వారి అధికార పరిధిలో నిర్వహిస్తాయని పేర్కొన్నారు. చట్టాల అమలును కేంద్ర ప్రభుత్వ రంగ సంస్థల్లో సెంట్రల్ ఇండస్ట్రియల్ రిలేషన్ మెషినరీ (సీఐఆర్ఎం) తనిఖీ అధికారులు చూడగా, రాష్ట్రాల్లో ఆయా ప్రభుత్వాలు పర్యవేక్షిస్తాయని మంత్రి వివరించారు.
