వక్ఫ్ సవరణ బిల్లు లోక్ సభలో ప్రవేశపెట్టారు. నేటి మధ్యాహ్నం కేంద్ర మంత్రి కిరణ్ రిజిజు ఈ బిల్లును సభలో ప్రవేశపెట్టారు. ఈ బిల్లుకు వ్యతిరేకంగా విపక్షాలు ఆందోళన చేపట్టాయి. వారి నిరసనల మధ్యే దీనిపై రిజిజు చర్చ చేపట్టారు. దాదాపు 8 గంటల పాటు చర్చ జరిగిన తరువాత ఓటింగ్ చేపట్టనున్నారు. వక్ఫ్ పాలకవర్గాల్లో మరింత పారదర్శకత, జవాబుదారీతనం పెంచుతూ పాలనలో మహిళల భాగస్వామ్యం తప్పనిసరి చేసేలా ఈ కొత్త బిల్లును కేంద్రం తీసుకొచ్చింది. ఈ మేరకు 1995 నాటి వక్స్ చట్టంలో దాదాపు 40 సవరణలు చోటుచేసుకోనున్నాయి. ముస్లిం సమాజం నుండి వస్తున్న డిమాండ్ల మేరకే ఈ మార్పులు చేస్తున్నట్లు ప్రభుత్వ వర్గాలు చెప్పాయి. ఈ బిల్లును గతేడాది ఆగస్టులోనే కేంద్రం లోక్ సభలో ప్రవేశపెట్టింది. విపక్షాల నుండి వచ్చిన నిరసనలతో అప్పుడు దానిని పార్లమెంటు స్టాండర్డ్ కమిటీ ముందుకు పంపింది. పలు ప్రతిపాదనలతో కమిటీ బిల్లును ఆమోదించిన నేపథ్యంలో నేడు పార్లమెంటు ముందుకు తీసుకొచ్చింది.
