అమెరికా రోడ్ల కంటే అద్భుతంగా మన రోడ్లు తీర్చిదిద్దుతాం: కేంద్ర మంత్రి నితిన్ గడ్కరీ

మన దేశంలోని రోడ్లను అమెరికా రోడ్ల కంటే అద్భుతంగా తీర్చిదిద్దుతామని కేంద్ర రోడ్డు రవాణా, రహదారుల శాఖ మంత్రి నితిన్ గడ్కరీ అన్నారు. అమెరికా సంపన్న దేశం కాబట్టి రోడ్లు బాగుంటాయని చాలా మంది అనుకుంటారని… అయితే, రోడ్లు బాగున్నందుకే అమెరికా సంపన్న దేశం అయిందని ఆ దేశ మాజీ అధ్యక్షుడు జాన్ ఎఫ్ కెన్నెడీ ఒక సందర్భంలో అన్నారని గుర్తు చేశారు. దేశాభివృద్ధిలో రహదారుల పాత్ర అత్యంత కీలకమైనదని అన్నారు. రోడ్లు బాగున్న దేశం అభివృద్ధి చెందుతుందని తెలిపారు. రెండేళ్లలో దేశంలోని జాతీయ రహాదారులు అద్భుతంగా తీర్చిదిద్దుతామని పేర్కొన్నారు.
ఇక మన రోడ్లకు సంబంధించి కేవలం తాను హామీలు మాత్రమే ఇవ్వడం లేదని ఆచరణలో చేసి చూపిస్తామని నితిన్ గడ్కరీ స్పష్టం చేశారు. కేంద్రంలో బీజేపీ ప్రభుత్వం అధికారంలోకి వచ్చిన తర్వాత నేషనల్ హైవేల బాధ్యతను తనకు అప్పగించారని… గత 11 ఏళ్లలో దేశ వ్యాప్తంగా ఎన్నో రహదారులు, ఫ్లైఓవర్లను నిర్మించామని పేర్కొన్నారు.