ఆప్ ఎమ్మెల్యే అరెస్ట్…!

గత ఏడాది నమోదైన దోపిడీ కేసులో ఆమ్ ఆద్మీ పార్టీ ఎమ్మెల్యే నరేశ్ బల్యాన్‌ను ఢిల్లీ పోలీసులు అరెస్ట్ చేశారు.వ్యాపారవేత్తల నుండి డబ్బులు ఎలా రాబట్టాలనే విషయంపై ప్రస్తుతం విదేశాల్లో ఉన్న గ్యాంగ్‌స్టర్ కపిల్ సంగ్వాన్‌తో బల్యాన్ చర్చలు జరిపినట్టుగా చెబుతున్న ఓ ఆడియో క్లిప్ ఉన్నట్టు పోలీసులు చెబుతున్నారు.ప్రస్తుతం ఈ ఆడియో సోషల్ మీడియాలో వైరల్ అవుతోంది.ఈ మేరకు ఢిల్లీలోని ఉత్తమ్ నగర్ అసెంబ్లీ నియోజకవర్గం నుండి అసెంబ్లీకి ప్రాతినిధ్యం వహిస్తున్న ఆయనను నిన్న విచారణకు పిలిచిన ఆర్కేపురం క్రైంబ్రాంచ్ పోలీసులు అనంతరం అరెస్ట్ చేశారు.అయితే దోపిడీలకు పాల్పడుతున్న నరేశ్‌పై ఆప్ చీఫ్ కేజ్రీవాల్ చర్యలు ఎందుకు తీసుకోవడం లేదని బీజేపీ నిలదీసిన అనంతరం ఈ ఘటన జరగడం విశేషం.బల్యాన్ అరెస్ట్‌ను ఆప్ తీవ్రంగా ఖండించింది.ఈ అరెస్ట్ అక్రమమని పేర్కొంది.ఈ విషయంపై దర్యాప్తు కొనసాగుతున్నట్టు పోలీసులు వెల్లడించారు.