ఐ.ఎన్.ఎస్ తుషిల్ భారత్ కు గర్వ‌కార‌ణం

భార‌త ర‌క్ష‌ణ మంత్రి రాజ్‌నాథ్ సింగ్ రష్యాలో పర్యటిస్తున్నారు.ఈ ప‌ర్య‌ట‌న‌లో భాగంగా కలినిన్‌గ్రాడ్ లోని యంటార్ షిప్‌యార్డ్‌ను సంద‌ర్శించారు. మల్టీ-రోల్ స్టెల్త్-గైడెడ్ మిస్సైల్ ఫ్రిగేట్ ఐ.ఎన్.ఎస్ తుషిల్ ను నౌకాద‌ళానికి అందించారు. ఈ సంద‌ర్భంగా రాజ్‌నాథ్ సింగ్ మాట్లాడుతూ ఐ.ఎన్.ఎస్ తుషిల్ నౌక భారతదేశానికి గ‌ర్వ‌కార‌ణ‌మ‌ని పేర్కొన్నారు. రష్యాతో దీర్ఘకాల ద్వైపాక్షిక సంబంధాలలో ఇదొక కీలక మైలురాయిగా నిలుస్తుంద‌ని పేర్కొన్నారు. ఐ.ఎన్.ఎస్ తుషీల్ (F70) అనేది భారత నౌకాదళానికి చెందిన తల్వార్ -క్లాస్ ఫ్రిగేట్ . ఐఎన్‌ఎస్‌ తుషిల్‌’ యొక్క బరువు 3,900 టన్నులు కాగా, పొడవు 125 మీటర్లు.ఈ యుద్ధ నౌకలో భారత పరిజ్ఞానం 26 శాతం వరకు ఉంది. ఇందులో శక్తిమంతమైన ఆయుధాలు ఉంటాయి. వాటిలో గైడెడ్ మిసైళ్లను, అధునాతన రాడార్లు, ఆయుధ వ్యవస్థలు ఉన్నాయి. ఈ నౌక చేరికతో భారత నౌకాదళ సామర్థ్యం మరింత పెరిగింది. 2016లో భారత్- రష్యాల మధ్య జరిగిన ఒప్పందం మేరకు, 250 కోట్ల డాలర్ల విలువతో నాలుగు స్టెల్త్ ఫ్రిగేట్ యుద్ధనౌకల నిర్మాణం మొదలైంది. వాటిలో రెండు యుద్ధనౌకలను రష్యాలో, మిగతా రెండు యుద్ధనౌకలను భారత్‌లో నిర్మించాలని నిర్ణయించారు.