ఏపీకి పెట్టుబడుల సాధనే లక్ష్యంగా ఇటీవలే ఏపీ సీఎం చంద్రబాబు పలువురు మంత్రుల బృందం దావోస్ లో పర్యటించిన సంగతి తెలిసిందే. ప్రపంచ ఆర్థిక సదస్సులో అంతర్జాతీయ పారిశ్రామిక ప్రముఖులు, దిగ్గజ సంస్థల అధినేతలతో వీరు సమావేశమై రాష్ట్రంలో పెట్టుబడుల కల్పనకు ఉన్న అవకాశాలను వివరించారు. కాగా, దావోస్ లో జరిపిన చర్చలు కార్యరూపం దాల్చేలా ప్రణాళికలతో సిద్ధంగా ఉండాలని సీఎం చంద్రబాబు అధికారులను ఆదేశించారు. ఉండవల్లి నివాసంలో ఏపీ సీఎస్ కె. విజయానంద్, సీఎంవో అధికారులతో ఆయన సమావేశమయ్యారు. మూడు రోజులపాటు దావోస్ లో జరిపిన చర్చల సారాంశాన్ని వారికి వివరించారు. త్వరలో దేశ, విదేశీ ప్రతినిధులు, సంస్థల సీఈవోలు రాష్ట్రంలో పర్యటించనున్నారని, దానికి తగినట్లుగా సిద్ధంగా ఉండాలని దిశానిర్దేశం చేశారు. వాటిని ముందుకు తీసుకువెళ్లేందుకు ప్రణాళికలు రూపొందించాలని వివరించారు.
