అటవీ శాఖ సిబ్బందికి సంబంధించిన ట్రైనింగ్ బలోపేతం చేసే విధంగా తూర్పు గోదావరి జిల్లా దివాన్ చెరువు సమీపంలో స్టేట్ ఫారెస్ట్ అకాడమీని నెలకొల్పాలని రాష్ట్ర ప్రభుత్వం నిర్ణయించింది. అటవీ శాఖ ఉద్యోగులు అటవీ, వన్య ప్రాణి సంరక్షణపై పటిష్టమైన శిక్షణ పొందేందుకు అనువైన వాతావరణం ఉండాలని, దానికి తగినట్లుగా ఏర్పాట్లు చేయాలని ఏపీ డిప్యూటీ సీఎం, అటవీ పర్యావరణ శాఖ మంత్రి పవన్ కళ్యాణ్ ఉన్నతాధికారులకు సూచించారు. శాఖ పరిధిలో ఉన్న కొన్ని స్థలాలను సూచించారు. దివాన్ చెరువు దగ్గర ఉన్న రక్షిత అటవీ ప్రాంతంలో అకాడమీని ఏర్పాటు చేస్తే సిబ్బందికి అవసరమైన శిక్షణ, అటవీ వాతావరణాన్ని కల్పించడంతోపాటు రవాణా, తత్సంబంధిత మౌలిక సదుపాయాలూ ఉంటాయని పవన్ కళ్యాణ్ అభిప్రాయపడ్డారు. ఇక అకాడమి ఏర్పాటుకి సంబంధించి ప్రధాని మోడీ, కేంద్ర పర్యావరణ అటవీ శాఖ మంత్రి భూపేంద్ర యాదవ్, ఏపీ సీఎం చంద్రబాబుకు డిప్యూటీ సీఎం పవన్ కృతజ్ఞతలు తెలిపారు.
