ఐపీఎల్ 18 లో భాగంగా బెంగళూరు లోని చిన్నస్వామి స్టేడియం వేదికగా తాజాగా జరిగిన రాయల్ ఛాలెంజర్స్ బెంగళూరు – పంజాబ్ కింగ్స్ మ్యాచ్ లో పంజాబ్ కింగ్స్ 5 వికెట్ల తేడాతో విజయం సాధించింది. వర్షం కారణంగా మ్యాచ్ 14 ఓవర్లకు కుదించారు. మొదటగా బ్యాటింగ్ చేసిన బెంగళూరు జట్టు 14 ఓవర్లలో 9 వికెట్లు కోల్పోయి 95 పరుగులకే పరిమితమయింది. టిమ్ డేవిడ్ 50 నాటౌట్ (26; 5×4, 3×6) హాఫ్ సెంచరీ చేసి అద్భుతమైన ఆటతీరుతో ఆకట్టుకున్నాడు. రజత్ పటేదార్ (23) మిగిలిన బ్యాటర్లు రెండంకెల స్కోర్ చేయలేకపోయారు. పంజాబ్ బౌలర్లలో అర్షదీప్ సింగ్, జాన్సన్, చాహాల్, హార్ ప్రీత్ బ్రార్ రెండేసి వికెట్లు పడగొట్టారు. బార్ట్లెట్ ఒక వికెట్ తీశాడు. ఇక స్వల్ప లక్ష్యాన్ని పంజాబ్ కింగ్స్ 12.1 ఓవర్లలో 5 వికెట్లు కోల్పోయి ఛేదించింది. నేహాల్ వధేరా 33 నాటౌట్ (19; 3×4, 3×6) రాణించాడు. బెంగళూరు బౌలర్లలో భువనేశ్వర్ 2 వికెట్లు, హేజల్ వుడ్ 3 వికెట్లు పడగొట్టారు.
