ముంబై ఇండియన్స్ మరో విజయంతో సత్తా చాటింది. ఆ జట్టుకు ఇది వరుసగా 6వ గెలుపు. జైపూర్ లోని సవాయ్ మాన్ సింగ్ స్టేడియం వేదికగా రాజస్థాన్ రాయల్స్ తో జరిగిన మ్యాచ్ లో ఆ జట్టు 100 పరుగుల తేడాతో ఘన విజయం సాధించింది. టాస్ ఓడి మొదట బ్యాటింగ్ చేసిన ముంబై నిర్ణీత 20 ఓవర్లలో 2 వికెట్ల నష్టానికి 217 పరుగుల భారీ స్కోరు చేసింది. రికెల్టన్ 61 (38; 7×4, 3×6), రోహిత్ శర్మ 53 (36; 9×4) హాఫ్ సెంచరీలతో అదిరే ఆరంభానిచ్చారు. సూర్య కుమార్ యాదవ్ 48 నాటౌట్ (23; 4×3, 3×6), హార్థిక్ పాండ్య 48 (23; 6×4, 1×6) ధాటిగా ఆడడంతో ముంబై ఇండియన్స్ రాజస్థాన్ రాయల్స్ ముందు భారీ లక్ష్యాన్ని ఉంచింది. ఇక లక్ష్యాన్ని ఛేదించే క్రమంలో రాజస్థాన్ రాయల్స్ మాత్రం 16.1 ఓవర్లలో కేవలం 117 పరుగులకే కుప్పకూలింది. జోఫ్రా ఆర్చర్ 30 (27; 2×4, 2×6) చెప్పుకోదగిన పరుగులు చేశాడు. మిగతా బ్యాటర్లు పూర్తిగా విఫలమయ్యారు. ముంబై బౌలర్లలో బౌల్ట్ 3 వికెట్లు, కర్న్ శర్మ 3 వికెట్లు, బుమ్రా 2 వికెట్లు, హార్దిక్ పాండ్య ఒక వికెట్ తీశారు.
