ఇటీవల దక్షిణాఫ్రికాతో టీ20 సిరీస్ లో వరుసగా రెండు శతకాలు సాధించిన భారత యువ కెరటం తిలక్ వర్మ (151, 67 బంతుల్లో 14×4, 10×6) మరోసారి సెంచరీతో ఆకట్టుకున్నాడు. ముస్తాక్ అలీ టోర్నీలో హైదరాబాద్ జట్టుకు ఆడుతూ మేఘాలయాపై ఈ శతకం నమోదు చేశాడు. దీంతో టీ20 ఫార్మాట్లో వరుసగా మూడు సెంచరీలు చేసిన తొలి బ్యాటర్ గా తిలక్ నిలిచాడు. భారత్ తరపున ఈ ఫార్మాట్లో 150 పైన పరుగులు చేసిన తొలి పురుష క్రికెటర్ అతడే. మహిళల్లో కిరణ్ నవిగిరె (162) ఈ ఘనత సాధించింది. కెప్టెన్ తిలక్ ధాటికి గ్రూప్-ఎ మ్యాచ్లో హైదరాబాద్ 179 పరుగుల తేడాతో మేఘాలయా పై ఘన విజయం సాధించింది. మొదట హైదరాబాద్ 4 వికెట్లకు 248 పరుగులు చేసింది. తిలక్ కి తోడు తన్మయ్ అగర్వాల్ (55) రాణించాడు. లక్ష్య ఛేదనలో అనికేత్ రెడ్డి (4/11), తనయ్ త్యాగరాజన్ (3/15) విజృంభించడంతో మేఘాలయా 15.1 ఓవర్లలో 69 పరుగులకే ఆలౌటైంది. ఆ జట్టు లో అర్పిత్ (27) పర్వాలేదనిపించాడు.
