జమ్మూ కాశ్మీర్ లో ఉగ్రదాడి… టూరిస్ట్ లపై కాల్పులు జరిపిన దుండగులు

కొంతకాలంగా ప్రశాంతంగా ఉన్న జమ్ము కశ్మీర్‌లో ఉగ్రవాదులు దుశ్చర్యకు దిగారు. నేడు అనంత్‌ నాగ్ జిల్లా పహల్గాంలో ఉగ్రవాదులు టూరిస్ట్ లపై కాల్పుల జరిగిన ఘటనలో ఒకరు మృతి చెందగా, ఆరుగురు గాయపడినట్లు ప్రాథమిక సమాచారం అందుతోంది. ఈ సంఘటనతో పహల్గాంలో ఒక్కసారిగా భయానక పరిస్థితి ఏర్పడింది.
మినీ స్విట్జర్లాండ్ గా పేర్కొనే పహల్గాంలోని బైసరన్ వ్యాలీ ఎగువ ప్రాంతంలోని ఒక పర్యాటక రిసార్టు వద్ద ఈ దాడి జరిగింది. ఈ ప్రాంతానికి కేవలం కాలినడకన లేదా గుర్రాల ద్వారా మాత్రమే చేరుకునే వీలుంటుంది. ఇలాంటి ప్రాంతంలో పర్యాటకులను లక్ష్యంగా చేసుకుని ఉగ్రవాదులు కాల్పులకు తెగబడ్డారు. సైనికుల వంటి దుస్తుల్లో వచ్చిన దుండగులు ఈ దాడికి పాల్పడినట్లు తెలుస్తోంది. పర్యాటకులను లక్ష్యంగా చేసుకుని ఈ దాడికి పాల్పడి ఉంటారని అనుమానిస్తున్నారు. ఈ దుర్ఘటనపై సమాచారం అందుకున్న వెంటనే భద్రతా బలగాలు, వైద్య బృందాలు హుటాహుటిన ఘటనా స్థలానికి చేరుకున్నాయి. గాయపడిన టూరిస్ట్ లను సమీపంలోని హాస్పిటల్ కు తరలించి చికిత్స అందిస్తున్నారు. భద్రతా దళాలు ఆ ప్రాంతాన్ని పూర్తిగా తమ ఆధీనంలోకి తీసుకుని, దాడికి పాల్పడిన ఉగ్రవాదుల కోసం ముమ్మర గాలింపు చర్యలు చేపట్టాయి.