మరొక కీలక ప్రయోగాన్ని ఇస్రో విజయవంతంగా నిర్వహించింది. అత్యంత అధునాతన సమాచార ఉపగ్రహాన్ని ఇస్రో అంతరిక్షంలో ప్రవేశపెట్టింది. ఎలాన్ మస్క్ కు చెందిన ‘స్పేస్ఎక్స్’కు చెందిన ఫాల్కన్-9 రాకెట్ ద్వారా చేపట్టిన ఈ ప్రయోగం సఫలమైంది.
ఫ్లోరిడాలోని కేప్ కెనావెరల్లో ఉన్న లాంచ్ కాంప్లెక్స్ 40 నుండి తాజాగా ఈ ప్రయోగం చేపట్టారు. అత్యంత సంక్లిష్టమైన, కీలకమైన ఈ శాటిలైట్ 34 నిమిషాలు ప్రయాణించినిర్దేశిత కక్ష్యలోకి చేరింది.
ఇస్రో వాణిజ్య విభాగం ‘న్యూ స్పేస్ ఇండియా లిమిటెడ్’ ద్వారా చేపట్టిన జీశాట్-20 ప్రయోగం అత్యంత కీలకమైనదని శాస్త్రవేత్తలు పేర్కొంటున్నారు. 4,700 కిలోల బరువు ఉండే ఈ ఉపగ్రహం పూర్తి వాణిజ్య అవసరాలకు సంబంధించినది. దీని ద్వారా మారుమూల ప్రాంతాల్లో కూడా బ్రాడ్ బ్యాండ్ సేవలను అందించవచ్చు. అలాగే విమానాల్లో ప్రయాణికులకు ఇంటర్నెట్ సేవలను వైఫై సౌకర్యాన్ని కల్పించవచ్చు. ఇస్రో, స్పేస్ఎక్స్ మధ్య మొదటి భాగస్వామ్యం ఇదేనని తెలిపారు.
