వ్యాపార, పారిశ్రామిక రంగాలతో పాటు పలు రంగాల్లో నూతన సృజనాత్మక ఆలోచనలు, ఆవిష్కరణలతో ముందుకొస్తున్న యువపారిశ్రామికవేత్తలను ప్రోత్సహించడమే లక్ష్యంగా కేంద్ర ప్రభుత్వం జనవరి 16, 2016న ప్రవేశ పెట్టిన స్టార్టప్ ఇండియా పథకానికి నిన్నటికి తొమ్మిదేళ్లు పూర్తయ్యాయి. ఈ సందర్భంగా జనవరి 16ను కేంద్ర ప్రభుత్వం నేషనల్ స్టార్టప్ డే గా ప్రకటించింది. స్టార్టప్ ఎకోసిస్టమ్ లో ప్రపంచంలో మొదటి స్థానంలో అమెరికా, 2వ స్థానంలో యునైటెడ్ కింగ్ డమ్, 3 వ స్థానంలో భారత్ ఉండగా..ఆ తర్వాతి స్థానాల్లో కెనడా, జర్మనీలు ఉన్నాయి.
డిపార్ట్మెంట్ ఫర్ ప్రమోషన్ ఆఫ్ ఇండస్ట్రీ అండ్ ఇంటర్నల్ ట్రేడ్ (డి.పి.ఐ.ఐ.టి) గణాంకాల ప్రకారం ప్రస్తుతం మొత్తం 28 రాష్ట్రాలు, 8 కేంద్ర పాలిత ప్రాంతాల్లో 1.59 లక్షల స్టార్టప్ లు గుర్తింపు పొందాయి. కేంద్రం ప్రారంభించిన స్టార్టప్ ఇండియా మనదేశాన్ని ప్రపంచంలోనే 3వ అతిపెద్ద స్టార్టప్ వ్యవస్థగా తీర్చిదిద్దింది. ప్రత్యక్షంగా ఈ స్టార్టప్లు దాదాపు 17లక్షలకు పైగా ఉద్యోగాలను సృష్టించాయి. 27,459 స్టార్టప్లతో మహారాష్ట్ర అగ్రస్థానంలో నిలిచింది. 15,851తో ఢిల్లీ 16,335తో కర్ణాటక తర్వాతి స్థానాల్లో ఉన్నాయి. యూనికార్న్ ల సంఖ్య 2016లో 11 నుండి 2024 నాటికి 118కి పెరిగింది. ఐటీ సేవల రంగంలో 17,618 స్టార్టప్ లు, హెల్త్ కేర్, లైఫ్ సైన్స్ 14,285, విద్యారంగానికి సంబంధించి 9,047 స్టార్టప్ల వృద్ధి రేటు గరిష్ట స్థాయికి చేరుకుంది.
