గిన్నిస్ రికార్డు: మహా కుంభమేళాలో 15వేల మంది పారిశుధ్య కార్మికుల క్లీన్ డ్రైవ్

ప్రపంచంలోనే అత్యంత వైభవోపేతంగా జరుగుతున్న అతి పెద్ద ఆధ్యాత్మిక వేడుకైన ‘మహాకుంభమేళా’ లో ఇప్ప‌టివ‌ర‌కు పుణ్య‌ స్నాన‌మాచ‌రించిన భ‌క్తుల సంఖ్య 60 కోట్లను దాటిందని ఇటీవలే యూపీ ప్రభుత్వం తెలిపింది. రేపటితో ఈ మహా కుంభమేళా ముగియనుంది. ఇక తాజాగా మహా కుంభమేళా ప్రాంతంలో పారిశుద్ధ్య కార్మికులు గిన్నిస్ రికార్డు లక్ష్యంగా అతిపెద్ద క్లీన్ డ్రైవ్ ను చేపట్టారు. దాదాపుగా 15వేల మంది కార్మికులు చీపురు చేతపట్టుకొని ఈ కార్యక్రమంలో పాల్గొన్నారు. ఈ కార్యక్రమాన్ని గిన్నిస్ బుక్ ఆఫ్ వరల్డ్ రికార్డ్స్ ప్రతినిధులు మరియు ప్రయాగ్ రాజ్ మేయర్ గణేష్ కేశర్వానీ, మహా కుంభమేళా ప్రత్యేక ఈవో ఆకాంక్ష రాణా పర్యవేక్షించారు. ఈ రికార్డుకు సంబంధించిన ఫైనల్ రిపోర్ట్ త్వరలో రానున్నట్లు తెలిపారు. ఇంతకు ముందు 2019లో ప్రయాగ్ రాజ్ లో 10వేల మంది పారిశుధ్య కార్మికులు గిన్నిస్ రికార్డులో స్థానం సాధించారు.