పాక్ పై దౌత్య యుద్ధం…భారత ప్రతినిధి బృందాల విదేశీ పర్యటనలు నేటి నుంచి ప్రారంభం

పాకిస్థాన్ ఉగ్ర కుట్రలకు ఇటీవలే ‘ఆపరేషన్ సిందూర్’ తో తగిన గుణపాఠం చెప్పిన భారత్ అంతర్జాతీయంగా కూడా పాక్ దుష్టబుద్దిని ఎండగట్టి ప్రపంచ దేశాల ముందు ఉంచేందుకు భారత్ తన దౌత్య కార్యకలాపాలను వేగవంతం చేసింది. ఇందులో భాగంగా ఏడు భారత ప్రతినిధి బృందాల్లో రెండు బృందాలు తమ నిర్దేశిత దేశాలకు ఈరోజు పయనమయ్యాయి. జేడీయూ ఎంపీ సంజయ్ ఝా నేతృత్వంలోని బృందం ఇండోనేసియా, మలేసియా, సౌత్ కొరియా, జపాన్, సింగపూర్ దేశాల్లో పర్యటించనుంది. ఈ బృందంలో బీజేపీ ఎంపీలు అపరాజిత సారంగి, బ్రిజ్ లాల్, హేమాంగ్ జోషి, ప్రదాన్ బారువా, తృణమూల్ కాంగ్రెస్ నేత అభిషేక్ బెనర్జీ, సీపీఎం ఎంపీ జాన్ బ్రిటాస్, కాంగ్రెస్ సీనియర్ నేత సల్మాన్ ఖుర్షీద్, మాజీ దౌత్యవేత్త మోహన్ కుమార్ ఉన్నారు. శివసేన ఎంపీ శ్రీకాంత్ షిండే నేతృత్వంలోని మరో బృందం యూఏఈ, డెమొక్రాటిక్ రిపబ్లిక్ ఆఫ్ కాంగో, సియెర్రా లియోన్, లైబీరియా దేశాలకు వెళ్లనుంది. ఉగ్రవాదాన్ని ప్రోత్సహించే పాకిస్తాన్ విధానం మరియు ‘ఆపరేషన్ సిందూర్’ కింద భారతదేశం తీసుకున్న చర్యల గురించి వాస్తవాన్ని ప్రపంచానికి తెలియజేయడమే ఈ పర్యటన ఉద్దేశ్యం.