భారత మహిళా క్రికెట్ జట్టు వరుసగా స్వదేశంలో రెండో సిరీస్ ను కైవసం చేసుకుంది. ఐర్లాండ్ తో జరుగుతున్న మూడు వన్డేల సిరీస్ లో భాగంగా తాజాగా జరిగిన రెండో వన్డేలో భారత్ 116 పరుగుల తేడాతో విజయం సాధించి మరో మ్యాచ్ మిగిలి ఉండగానే సిరీస్ గెలిచింది. మ్యాచ్ లో మొదట బ్యాటింగ్ చేసిన భారత్ 5 వికెట్లు కోల్పోయి 370 పరుగులు భారీ స్కోరు సాధించింది. జెమీమా రోడ్రిగ్స్ 102 (91; 12×4) సెంచరీతో అదరగొట్టింది.హార్లీన్ డియోల్ 89 (84;12×4), కెప్టెన్ స్మృతి మంథాన 73 (54; 10×4, 2×6), ప్రతీక రావల్ 67 (61; 8×4,1×6) హాఫ్ సెంచరీలతో రాణించారు. దీంతో భారత్ భారీ లక్ష్యాన్ని ప్రత్యర్థి ముందుంచింది. అనంతరం బ్యాటింగ్ ఆరంభించిన ఐర్లాండ్ 7 వికెట్లు కోల్పోయి 254 పరుగులు మాత్రమే చేయగలిగింది. క్రిస్టీనా రిలీ 80 (113; 10×4) ఆకట్టుకుంది, సారా ఫోర్బ్స్ (38), లారా డెలానీ (37), లియా (27 నాటౌట్) పోరాడారు. భారత బౌలర్లలో దీప్తి శర్మ (3/37), ప్రియా మిశ్రా (2/53) ఐర్లాండ్ ను కట్టడి చేయడంలో కీలక పాత్ర పోషించారు.
