ఉత్తరప్రదేశ్ ప్రభుత్వం భారత మ‌హిళా క్రికెటర్ దీప్తి శర్మను డిప్యూటీ సూపరింటెండెంట్ ఆఫ్ పోలీస్ గా నియ‌మించింది. ఒక క్రికెటర్‌గా దేశానికి ఆమె చేసిన సేవ‌ను గుర్తించి ఈనెల 27న యూపీలోని మొరాదాబాద్ జిల్లాలో డీఎస్‌పీగా నియమిస్తూ ఉత్త‌ర్వులు జారీ చేసింది. ఈ విష‌యాన్ని దీప్తి త‌న ఇన్‌స్టాగ్రామ్ ద్వారా తెలిపారు. ఈ సంద‌ర్భంగా త‌న‌కు త‌గిన గౌరవం ఇచ్చినందుకు ఉత్తరప్రదేశ్ ప్రభుత్వానికి ధన్యవాదాలు తెలిపారు. ఈ మైలురాయిని సాధించినందుకు ఎంతో గ‌ర్వంగా ఉంది. డీఎస్‌పీ పోస్టుతో నా చిన్న‌నాటి క‌ల నెర‌వేరింది. అన్ని విధాల నాకు తోడ్పాటు అందించిన నా కుటుంబానికి హృదయపూర్వక కృతజ్ఞతలు. వారి అచంచలమైన మద్దతు, ఆశీర్వాదాలు నేడు న‌న్ను ఈ స్థాయిలో నిల‌బెట్టాయి. ఈ అవకాశం కల్పించినందుకు ఉత్తరప్రదేశ్ ప్రభుత్వానికి కూడా కృతజ్ఞతలు . డీఎస్‌పీగా నా విధులను చిత్తశుద్ధితో నిర్వ‌హిస్తాన‌ని ఆమె పేర్కొన్నారు.
