నాలుగో టీ20 లో ఇంగ్లాండ్ పై భారత్ ఘనవిజయం: సిరీస్ కైవసం

భారత్ ఇంగ్లాండ్ జట్ల మధ్య 5 టీ20ల సిరీస్ లో భాగంగా నేడు జరిగిన నాలుగో మ్యాచ్ లో భారత్ 15 పరుగులు తేడాతో విజయం సాధించి 3-1 ఆధిక్యంలోకి వెళ్లి మరో మ్యాచ్ మిగిలి ఉండగానే సిరీస్ కైవసం చేసుకుంది. టాస్ గెలిచిన ఇంగ్లాండ్ ముందు బౌలింగ్ ఎంచుకుంది. దీంతో మొదట బ్యాటింగ్ చేసిన భారత్ నిర్ణీత 20 ఓవర్లలో 9 వికెట్ల నష్టానికి 181 పరుగులు చేసింది. హార్థిక్ పాండ్య 53 (30; 4×4, 4×6) ఇంగ్లాండ్ బౌలర్లపై విరుచుకుపడ్డాడు. శివమ్ దూబే 53 (34; 7×4, 2×6) కూడా దూకుడైన ఆటతీరుతో ఆకట్టుకున్నాడు. రింకూ సింగ్ 30 (26; 4×4, 1×6), అభిషేక్ శర్మ 29 (19; 4×4, 1×6) పర్వాలేదనిపించారు. మిగిలిన బ్యాటర్లు విఫలమయ్యారు. ఇంగ్లాండ్ బౌలర్లలో సాకిబ్ మహ్మద్ 3 వికెట్లు, జామి ఓవర్టన్ 2 వికెట్లు, అదిల్ రషీద్, బ్రిడన్ కార్సే ఒక్కో వికెట్ చొప్పున పడగొట్టారు. ఇక లక్ష్య ఛేదనలో ఇంగ్లాండ్ దూకుడుగా ఆడింది. అయితే పరుగులు వస్తున్నా భారత బౌలర్లు క్రమం తప్పకుండా వికెట్లు పడగొడుతూ ప్రత్యర్థిపై పైచేయి సాధించారు. హ్యారీ బ్రూక్ 51 (26; 5×4, 2×6) హాఫ్ సెంచరీతో రాణించాడు. బెన్ డకెట్ 39 (19; 7×4, 1×6), ఫిలిప్ సాల్ట్ 23 (21; 4×4) పర్వాలేదనిపించారు. మిగిలిన బ్యాటర్లు పెద్దగా ఆకట్టుకోలేదు. భారత బౌలర్లలో హార్షిత్ రాణా 3 వికెట్లు, రవి బిష్ణోయ్ 3 వికెట్లు, వరుణ్ చక్రవర్తి 2 వికెట్లు, అర్ష్ దీప్ సింగ్, అక్షర్ పటేల్ ఒక్కో వికెట్ చొప్పున పడగొట్టారు. బ్యాటింగ్, బౌలింగ్, ఫీల్డింగ్ ఇలా అన్ని విభాగాల్లో అత్యద్భుతమైన ఆటతీరుతో భారత్ సిరీస్ సొంతం చేసుకుంది.