తెలుగు చెస్ క్రీడాకారుడు గ్రాండ్ మాస్టర్ అర్జున్ ఇరిగేశీ 2800 ఎలో రేటింగ్ ను అందుకుని చరిత్ర సృష్టించాడు. భారత్ తరపున దిగ్గజ గ్రాండ్ మాస్టర్ విశ్వనాథన్ ఆనంద్ మాత్రమే ఇప్పటి వరకు ఈ ఘనత సాధించగా.. ఇప్పుడు అర్జున్ ఈ అరుదైన ఘనత సాధించాడు. తాజా ఫిడే ర్యాంకింగ్స్ లో ఈ 21 సంవత్సరాల యువ కెరటం 4వ స్థానంలో కొనసాగుతున్నాడు. చదరంగం చరిత్రలోనే 2800 ఎలో రేటింగ్ అందుకున్న 16వ ఆటగాడిగా నిలిచాడు. ప్రస్తుతం 2801 రేటింగ్ తో ఉన్నాడు. వరంగల్ కు చెందిన ఈ తెలుగు కుర్రాడు 14 ఏళ్ల వయసులోనే గ్రాండ్ మాస్టర్ టైటిల్ సాధించాడు. ఇటీవల జరిగిన చెస్ ఒలింపియాడ్ లో టైటిల్ మరియు వ్యక్తిగత పసిడిని గెలుపొందాడు.
