శ్రీకాకుళంలో రథసప్తమి ఉత్సవాల వేడుకలు ఘనంగా జరుగుతున్నాయి. ఈ వేడుకల ఉత్సవాల శోభాయాత్ర అంగరంగ వైభవంగా జరిగింది. వివిధ రకాల వేషధారణలు, కోలాటాలు, తప్పెటగుళ్లు, డప్పు వాయిద్యాలు, గిరిజన నృత్యాలు, శకటాలు, ఆట పాటలతో పట్టణంలో ఆధ్యాత్మిక శోభ నింపింది. ఈ 3 రోజుల కార్యక్రమాలు ప్రతి ఒక్కరినీ మరింత ఆనందింప జేయనున్నాయి. రథసప్తమి ఉత్సవాల సందర్భంగా ఆధ్యాత్మికత, ప్రశాంతతను ప్రతిబింబించేలా సామూహిక సూర్య నమస్కారాల కార్యక్రమం నిర్వహించారు. ఉత్సవాల్లో భాగంగా శ్రీకాకుళం ఎన్టీఆర్ మున్సిపల్ స్టేడియంలో నిర్వహించిన సంగిడి రాళ్లు, ఉలవలు బస్తాలు ఎత్తుట, కర్రసాము, కత్తిసాము, పిల్లి మొగ్గలు తదితర గ్రామీణ క్రీడలు, వెయిట్ లిఫ్టింగ్ జిల్లా పోటీలు, రాష్ట్ర స్థాయి వాలీబాల్ పోటీలను కేంద్ర మంత్రి కింజరాపు రామ్మోహన్ నాయుడు ప్రారంభించారు. గ్రామీణ క్రీడలు, క్రీడాకారుల ప్రతిభను వెలికి తీసేందుకు ఇది ఎంతగానో తోడ్పడుతుందని పేర్కొన్నారు.
