ఆంధ్రప్రదేశ్ రాష్ట్రంలో రేపు జరగాల్సిన గ్రూప్-2 మెయిన్స్ పరీక్షను అభ్యర్థుల ఆందోళలను దృష్టిలో ఉంచుకుని వాయిదా వేయాలని ఏపీ ప్రభుత్వం లేఖ రాసిన సంగతి తెలిసిందే. ఆ రాసిన లేఖకు ఏపీపీఎస్సీ తాజాగా బదులిచ్చింది. రేపటి పరీక్షను యధావిధిగా జరుగుతుందని స్పష్టం చేసింది. వాయిదా వేయలేమని పేర్కొంది. రాష్ట్రంలో ఎమ్మెల్సీ ఎన్నికల కోడ్ అమల్లో ఉన్నందున, గ్రాడ్యుయేట్లకు ప్రయోజనం కల్పించే నిర్ణయాలు తీసుకోలేమని ఏపీపీఎస్సీ ఈమేరకు స్పష్టం చేసింది. 2023లో గ్రూప్-2 పరీక్షల కోసం విడుదల చేసిన నోటిఫికేషన్ ప్రకారం… రోస్టర్ పాయింట్ల విధానంలో తప్పులున్నాయని, వాటిని సరిదిద్దిన తర్వాతే గ్రూప్-2 మెయిన్స్ పరీక్ష నిర్వహించాలని గత కొన్ని రోజులుగా అభ్యర్థులు ఆందోళనలు వ్యక్తం చేస్తున్నారు. తాజాగా రాష్ట్ర ప్రభుత్వం ఏపీపీఎస్సీకి రాసిన లేఖకు ఈ దశలో పరీక్షను వాయిదా వేయలేమని ఏపీపీఎస్సీ బదులు ఇచ్చింది.
