భారత్, పాకిస్థాన్‌ల మధ్య సరిహద్దుల్లో నెలకొన్న ఉద్రిక్త పరిస్థితులు దేశీయ స్టాక్ మార్కెట్లపై ప్రభావం చూపాయి. పాకిస్థాన్ దళాలు సరిహద్దు ప్రాంతాలపై దాడులకు పాల్పడటం, భారత సైన్యం వాటిని సమర్థంగా తిప్పికొట్టడంతో యుద్ధ భయాలు నెలకొన్నాయి. ఈ నేపథ్యంలో ఇన్వెస్టర్లు అమ్మకాలకు ఆసక్తి చూపడంతో దేశీయ సూచీలు వరుసగా రెండో రోజూ కూడా భారీ నష్టాలను చవిచూశాయి. బాంబే స్టాక్ ఎక్స్ చేంజ్ సూచీ సెన్సెక్స్ 880 పాయింట్లు నష్టపోయి 79,454 వద్ద స్థిరపడగా… నేషనల్ స్టాక్ ఎక్స్ చేంజ్ సూచీ నిఫ్టీ కూడా దాదాపు 265 పాయింట్ల నష్టంతో 24,008 వద్ద స్థిరపడింది. డాలర్ తో రూపాయి మారకం విలువ రూ.85.41గా కొనసాగుతోంది. సెన్సెక్స్ 30 సూచీలో టైటాన్‌, ఎల్ అండ్ టీ, టాటా మోటార్స్‌, ఎస్బీఐ, ఏషియన్‌ పెయింట్స్‌ షేర్లు లాభాలతో ముగిశాయి.
