బంగారం ధర దూసుకెళ్తోంది. అంతర్జాతీయ స్థాయిలో అలాగే దేశీయంగానూ రోజురోజుకూ పరుగులు పెడుతూ సామాన్యుడికి మరింత దూరంగా జరుగుతోంది. అమెరికా-చైనాల మధ్య రెసిప్రొకల్ టారిఫ్ వార్ నేపథ్యంలో బంగారం, వెండి లోహాలపై పెట్టుబడులకు ఇన్వెస్టర్లు ఆసక్తి కనబరుస్తుండడంతో పసిడి రేటు పరుగులు పెడుతోంది. అంతర్జాతీయంగా ఔన్సు 24 క్యారెట్ ల గోల్డ్ రేటు మొన్నటితో పోలిస్తే 107 డాలర్లకు మించి పెరిగి, 3330 డాలర్లకు చేరింది. భారత్ లో కూడా భారీగా పెరిగింది. హైదరాబాద్ బులియన్ మార్కెట్ లో నిన్న రాత్రి 11.30 గంటల సమయానికి 10 గ్రాముల 24 క్యారెట్ల బంగారం ధర 98,400కి చేరింది. కిలో వెండి ధర రూ.98,900 వద్ద ట్రేడ్ అవుతోంది. దేశీయ కమొడిటీ ఎక్స్ఛేంజ్ లో 10 గ్రాముల మేలిమి బంగారం ధర గరిష్ఠంగా రూ.95,732ను చేరి చివరకు రూ.93,451 వద్ద ముగిసింది.
