అటవీ శాఖలో సమూల సంస్కరణలకు నడుం బిగించిన డిప్యూటీ సీఎం, అటవీ పర్యావరణ శాఖ మంత్రి పవన్

అటవీ శాఖలో సమూల సంస్కరణలకు డిప్యూటీ సీఎం, అటవీ పర్యావరణ శాఖ మంత్రి పవన్ కళ్యాణ్ దృష్టి సారించారు.గత ఆరు నెలలుగా పంచాయతీ రాజ్, గ్రామీణాభివృద్ధి శాఖలపై పూర్తి స్థాయిలో దృష్టి నిలిపి, గ్రామీణ పాలన, క్షేత్రస్థాయి పర్యటనలు, అభివృద్ధి, సంస్కరణలతో తనదైన ముద్ర వేసిన పవన్ కళ్యాణ్ తాజాగా అటవీశాఖలో సమగ్ర మార్పుల మీద దృష్టి సారించినట్లు డిప్యూటీ సీఎం కార్యాలయం ఒక ప్రకటనలో తెలిపింది. దశాబ్దాలుగా అటవీ శాఖలో ఉన్న సమస్యలు, పరిష్కారం మార్గాలపై సత్వరమే నివేదిక సిద్ధం చేయాలని శాఖ పి.సి.సి.ఎఫ్. మరియు హెచ్.ఓ.ఎఫ్.ఎఫ్.ను ఆదేశించారు.అటవీ భూముల పరిరక్షణ కోసం కఠిన చర్యలు, ఎర్ర చంద్రనం అక్రమ రవాణాపై ఉక్కుపాదం మోపడం, అటవీ ఉత్పత్తుల ఆదాయం పెంపు దిశగా ప్రణాళికలు, వన్యప్రాణుల సంరకణకు ప్రాధాన్యత, అటవీ శాఖ సిబ్బంది కొరత తీర్చడం, కలప ద్వారా ఆదాయ వనరుల వృద్ధి వంటివాటిపై డిప్యూటీ సీఎం పవన్ దృష్టి సారించనున్నారు.