త్వరలో ఢిల్లీ అసెంబ్లీ ఎన్నికలు జరగనున్న సంగతి తెలిసిందే. ఈ ఎన్నికలలో తాము ఒంటరిగా పోటీ చేయనున్నట్లు అరవింద్ కేజ్రీవాల్ ఇప్పటికే స్పష్టం చేశారు. ఇటీవల ఆప్ పై కాంగ్రెస్ నేత అజయ్ మాకెన్ విమర్శలు గుప్పించారు. 2013లో ఆ పార్టీకి మద్దతివ్వడం కాంగ్రెస్ చేసిన అతిపెద్ద తప్పని పేర్కొన్నారు. ఆ కారణంగా ఢిల్లీలో కాంగ్రెస్ బలహీనపడిందని అభిప్రాయపడ్డారు. ఆ పొరపాటును ఇప్పటికైనా సరిచేసుకోవాల్సిన అవసరం ఉందని అన్నారు. ఇది తన అభిప్రాయమేనని అన్నారు. ఢిల్లీ లో పొల్యూషన్ కంట్రోల్, లా అండ్ ఆర్డర్, మౌలిక వసతుల కల్పనలో విఫలమయ్యాయని బీజేపీ, ఆమ్ ఆద్మీ పార్టీలపై అజయ్ మాకెన్ విమర్శించారు. జన్ లోక్ పాల్ అంశంలో ఆప్ తీరుని ఆక్షేపించారు. దీనిపై కాంగ్రెస్ ఆప్ ల మధ్య మాటల యుద్ధం కొనసాగుతోంది. ఆప్ నేత సంజయ్ సింగ్ దీనిపై స్పందించారు. తమ పార్టీ కన్వీనర్ అరవింద్ కేజ్రీవాల్ పై అజయ్ మాకెన్ హాద్దులు దాటి మాట్లాడారని 24 గంటలలో ఆయనపై కాంగ్రెస్ పార్టీ చర్యలు తీసుకోవాలని లేకుంటే కాంగ్రెస్ పార్టీని ఇండియా కూటమి నుండి తప్పించేందుకు మిగిలిన పార్టీలతో మాట్లాడుతామని పేర్కొన్నారు.
