ఈ రోజు వెలగపూడి సచివాలయంలో జిల్లాలు, మండలాలు, గ్రామాల పేర్లు, సరిహద్దుల మార్పులపై జరిగిన గ్రూప్ ఆఫ్ మినిస్టర్స్ తొలిభేటీలో మంత్రులు అనిగాని సత్య ప్రసాద్, నారాయణ, హోం మంత్రి , బి.సి.జనార్థన్ రెడ్డి, రామా నాయుడు, నాదెండ్ల మనోహర్, సత్య కుమార్ లు పాల్గొన్నారు. జిల్లాల పేర్లు సరిహద్దుల మార్పుపై ఇప్పటికే ప్రభుత్వానికి అందిన వినతులపై చర్చించినట్లు తెలిపారు. ఈరోజు కూడా కొంతమంది ప్రజలు తమకు కొత్త మండలాలు ఏర్పాటు చేయాలని, జిల్లాల సరిహద్దులు మార్చాలని వినతులు సమర్పించారని వివరించారు. త్వరలోనే మంత్రుల బృందం జిల్లాలలో పర్యటించి ప్రజల అభిప్రాయాలను కూడా స్వీకరిస్తుందని స్పష్టం చేశారు. ప్రజల వెసులుబాటు, ఆయా ప్రాంతాలతో ముడిపడిన సాంస్కృతిక భావోద్వేగాలు, దూరాభారం ఇలా పలు అంశాలను బేరీజు వేసుకుని జిల్లాలు, మండలాలు, గ్రామాల భౌగోళిక సరిహద్దులపై రాష్ట్ర ప్రభుత్వం ప్రజలందరికీ ఆమోదయోగ్యమైన, సామరస్య నిర్ణయం తీసుకుంటుందని వివరించారు.
