Author: admin

కేరళలోని పెరుంబవూర్‌ ప్రాంతంలో ఉద్యోగులపై అమానుష ఘటన వెలుగులోకి వచ్చింది. లక్ష్యాలు చేరుకోలేదని ఉద్యోగులను కుక్కలా నడిపించడం,నేలపై నాణేలను నోటితో తీయించడంతో సంచలనం రేగింది.ఈ దృశ్యాలకు సంబంధించిన వీడియో ఒకటి ఇంటర్నెట్‌లో వైరల్‌ అయ్యింది.ఇది స్థానికంగా ఉన్న ఓ ప్రైవేట్‌ మార్కెటింగ్‌ కంపెనీలో జరిగిందని తెలుస్తోంది.పనితీరు బాగా లేకపోతే ఉద్యోగులను ఇలాంటి అవమానకర శిక్షలకు గురిచేస్తున్నారన్న ఆరోపణలు వినిపిస్తున్నాయి.ఈ ఘటనపై కొంతమంది ధైర్యంగా బయటకు వచ్చి వాస్తవాలు వెల్లడించగా,మరికొందరు భయంతో మాట్లాడటం లేదు.ఉద్యోగుల హక్కుల్ని కాలరాసే ఈ చర్యపై తీవ్ర స్పందన వ్యక్తమవుతోంది.విషయం తెలుసుకున్న కేరళ కార్మిక శాఖ ఘటనపై విచారణ ప్రారంభించింది.బాధిత ఉద్యోగులకు న్యాయం జరగాలని సామాజిక కార్యకర్తలు డిమాండ్‌ చేస్తున్నారు.బాధ్యులపై కఠిన చర్యలు తీసుకోవాలని ప్రజలు కోరుతున్నారు.

సౌదీ అరేబియా ప్రభుత్వం ఉమ్రా, బిజినెస్‌, ఫ్యామిలీ విజిట్ వీసాలపై తాత్కాలిక నిషేధం విధించింది. సరైన ధ్రువీకరణ లేకుండా హజ్‌ యాత్రకు ప్రయత్నించే వారిని అడ్డుకునేందుకు ఈ నిర్ణయం తీసుకుంది. కొన్ని దేశాలవారు ఇతర వీసాలపై వచ్చి గడువు ముగిసినా సౌదీలో ఉండుతూ, అనధికారంగా హజ్‌లో పాల్గొంటున్నారని అధికారులు తెలిపారు. ఈ నిషేధం భారత్, పాకిస్థాన్, బంగ్లాదేశ్‌ సహా మొత్తం 14 దేశాలకు వర్తించనుంది. హజ్‌ యాత్రను సజావుగా, భద్రంగా నిర్వహించేందుకు కొత్త నిబంధనలు అమల్లోకి వచ్చాయి. సరైన రిజిస్ట్రేషన్‌, అనుమతులు లేని వారిని పట్ల కఠినంగా వ్యవహరించనున్నట్లు ప్రభుత్వం హెచ్చరించింది. వీసాల జారీ ప్రక్రియను గట్టిగా పర్యవేక్షించనుంది. ఈ చర్యల ద్వారా హజ్‌ వ్యవస్థలో పారదర్శకత, క్రమబద్ధత పెరుగుతుందని భావిస్తున్నారు. అధికారిక ఛానళ్ల ద్వారానే వీసా పొందాలని అధికారులు పిలుపునిచ్చారు. నిబంధనల ఉల్లంఘనకు పాల్పడినవారిపై కఠిన చర్యలు తీసుకుంటామని స్పష్టం చేశారు.

భారతదేశంలో మొత్తం బ్యాంకు ఖాతాల్లో 39.2 శాతం మహిళల పేరిట ఉండగా, గ్రామీణ ప్రాంత మహిళల ఖాతాల శాతం పట్టణాలను మించి 42.2 శాతంగా ఉంది.గణాంకాలు, కార్యక్రమాల అమలు మంత్రిత్వ శాఖ విడుదల చేసిన ‘ఉమెన్ అండ్ మెన్ ఇన్ ఇండియా 2024’ నివేదిక ఈ అంశాన్ని బట్టబయలుచేసింది.బ్యాంకు డిపాజిట్లలో మహిళల వాటా 39.7 శాతంగా ఉండటం విశేషం.డీమ్యాట్ ఖాతాల్లో మహిళల ప్రాతినిధ్యం నాలుగు రెట్లు పెరిగిందని నివేదిక తెలిపింది.2021లో 0.667 కోట్ల నుంచి 2024లో 2.771 కోట్లకు చేరినట్లు వెల్లడించింది.ఎన్నికల్లో కూడా మహిళల ఓటింగ్ శాతం గణనీయంగా పెరిగి లింగ ఆధారిత ఓటింగ్ అంతరాన్ని తగ్గించింది.వ్యాపార, సేవారంగాల్లో మహిళల యాజమాన్యం గల సంస్థల సంఖ్య పెరిగింది. 2017లో 1,943 స్టార్టప్‌లుండగా 2024లో 17,405గా పెరిగాయి.విద్యా రంగంలో లింగ సమానత్వం మెరుగుపడుతోందని నివేదిక పేర్కొంది.మహిళల ఆర్థిక, సామాజిక పురోగతికి ఇది చక్కటి సంకేతంగా కనిపిస్తోంది.

బెంగాల్‌లో 25,753 మంది టీచర్ల నియామకాన్ని సుప్రీంకోర్టు రద్దు చేసిన విషయం తెలిసిందే. నియామక ప్రక్రియ లోపభూయిష్టంగా ఉందని తేల్చిన కోర్టు, నియామకాలను చట్టబద్ధంగా మూడు నెలల్లో పూర్తి చేయాలని ఆదేశించింది. ఈ నేపథ్యంలో సీఎం మమతా బెనర్జీ బాధిత టీచర్లతో సమావేశమయ్యారు.తాను బ్రతికినంత వరకూ ఎవరు ఉద్యోగాలు కోల్పోనీయనని ఆమె హామీ ఇచ్చారు.ఈ నిర్ణయంతో తన గుండె రాయిలా మారిందని భావోద్వేగంగా మాట్లాడారు.తన వ్యాఖ్యలపై జైలుకు వెళ్లాల్సిన పరిస్థితి వచ్చినా వెనక్కి తగ్గనని స్పష్టం చేశారు.అర్హులైన అభ్యర్థులకు న్యాయం చేయడానికి తాను కట్టుబడి ఉన్నానని తెలిపారు.టీచర్లు న్యాయం కోసం కష్టపడొద్దని,ప్రభుత్వం వారి వెన్నుతట్టిదని భరోసా ఇచ్చారు.కొత్త నియామక ప్రక్రియ త్వరలో ప్రారంభమవుతుందని తెలుస్తోంది.ఈ ఘటనపై రాష్ట్రవ్యాప్తంగా రాజకీయ దుమారం మళ్ళీ రేగే సూచనలు కనిపిస్తున్నాయి.

ప్రపంచ దేశాలపై అమెరికా ప్రెసిడెంట్ డొనాల్డ్ ట్రంప్ విధించిన టారిఫ్ ధాటికి విలవిల్లాడుతున్నారు. అయితే యాపిల్ కంపెనీ టారిఫ్ ల భారం నుండి కొంత ఉపశమనం పొందేందుకు వేగంగా స్పందించింది. భారత్, చైనాలలో తయారైన ఐఫోన్లను విమానాల్లో అమెరికాకు చేరవేసింది. కేవలం మూడు రోజుల వ్యవధిలో 5 విమానాలలో ఐఫోన్లను ఎగుమతి చేసినట్లు అంతర్జాతీయ కథనాలు వస్తున్నాయి. భారత్ నుండి మూడు విమానాలు, చైనా నుండి రెండు విమానాలు ఐఫోన్లతో అమెరికా చేరుకున్నట్లు సమాచారం. ఏప్రిల్ 2 నుంచి ప్రతీకార సుంకాలు అమలులోకి వస్తాయన్న ప్రకటన నేపథ్యంలో మార్చి నెలాఖరులో యాపిల్ యాజమాన్యం ఈమేరకు నిర్ణయం తీసుకున్నట్లు తెలుస్తోంది. టారిఫ్ ల భారం తగ్గించుకోవడానికి భారత్, చైనాలలోని తమ ఫ్యాక్టరీలలో తయారైన ఐఫోన్లన్నింటినీ వెంటనే అమెరికాకు చేరవేసింది. దీనివల్ల ఐఫోన్ల ధరలను మరికొంతకాలం స్థిరంగా ఉంచేందుకు యాపిల్ కంపెనీకి అవకాశం లభించిందని ఆర్థిక నిపుణులు అభిప్రాయపడుతున్నారు.

భారత రాష్ట్రపతి ద్రౌపది ముర్ము పోర్చుగల్, స్లోవేకియా దేశాల పర్యటనకు వెళ్లారు. ఈ విషయాన్ని ప్రెసిడెంట్ ఆఫ్ ఇండియా కార్యాలయం సోషల్ మీడియా ‘ఎక్స్’ వేదికగా తెలిపింది. 25 సంవత్సరాల తర్వాత భారత రాష్ట్రపతి ఈ దేశాల్లో పర్యటించడం ఇదే తొలిసారి. ఈ పర్యటనలతో యూరోపియన్ యూనియన్‌కు చెందిన ఈ రెండు ముఖ్యమైన భాగస్వామ్య దేశాలతో భారతదేశం బహుముఖ సంబంధాలను మరింత విస్తరించనున్నదని తెలిపింది. భారత్-పోర్చుగల్ దౌత్య సంబంధాలకు 50 ఏళ్లు పూర్తయిన సందర్భంగా ద్రౌపది ముర్ము లిస్బన్‌లో పర్యటించనున్నారు. President Droupadi Murmu departs for historic State visits to Portugal and the Slovak Republic. These are the first State visits to either country by the President of India in more than 25 years. The visits will further expand India's multifaceted engagement with two…

‘గవర్నమెంట్ ఆఫ్ ఇండియా స్టాట్స్’ విడుదల చేసిన తాజా గణాంకాల ప్రకారం, 2024–25 సంవత్సరానికి దేశంలో రెండవ అత్యధిక వృద్ధిరేటు 8.21% తో ఆంధ్రప్రదేశ్ రాష్ట్రం ఉండడం పట్ల ఏపీ మంత్రి నారా లోకేష్ స్పందించారు. ఏపీని తిరిగి ఆర్థిక స్థిరత్వం మరియు అభివృద్ధి మార్గంలోకి తీసుకురావడం సీఎం చంద్రబాబుకే సాధ్యమని పేర్కొన్నారు . ఈసందర్భంగా లోకేష్ హార్షం వ్యక్తం చేశారు. 2024–25లో 8.21% అద్భుతమైన వృద్ధితో (గతేడాది 6.18% నుండి పెరిగి), ఆంధ్రప్రదేశ్ ఇప్పుడు దేశంలో రెండవ స్థానంలో నిలిచింది. మన రాష్ట్ర స్థూల జాతీయ ఉత్పత్తి రూ.8.73 లక్షల కోట్లకు పెరిగింది. ఇది దార్శనిక నాయకత్వం, ఆర్థిక క్రమశిక్షణ మరియు మంచి పాలనకు నిదర్శనమని నిజమైన సంస్కర్త నాయకత్వంలో ఏపీ అభివృద్ధి పథంలో దూసుకెళ్తోందని పేర్కొన్నారు.

అల్లూరి సీతారామరాజు జిల్లాలో ఏపీ డిప్యూటీ సీఎం పవన్ కళ్యాణ్ రెండు రోజుల పాటు పర్యటన చేయనున్నారు. ఈమేరకు ఆయన ఈరోజు ఉదయం విశాఖ విమానాశ్రాయానికి చేరుకున్నారు. అక్కడి నుంచి నేరుగా డుంబ్రిగూడ మండలం, పోతంగి పంచాయతీ పెదపాడు గ్రామానికి బయలుదేరారు. గిరిజన గ్రామాల అభివృద్ధి నిమిత్తం చేస్తూనే “అడవి తల్లి బాట” కార్యక్రమానికి పెదపాడు గ్రామంలో పవన్ కళ్యాణ్ శ్రీకారం చుడతారు. వివిధ కార్యక్రమాలకు హాజరు కానున్నారు . ఇక అంతకు ముందు విమానాశ్రయంలో విశాఖ జిల్లా కలెక్టర్ శ్రీ ఎం.ఎన్.హరేంద్రప్రసాద్, ఇతర ఉన్నతాధికారులు, ఎమ్మెల్యేలు ఆయనకు ఘనస్వాగతం పలికారు.

వరల్డ్ బాక్సింగ్ కప్ లో గోల్డ్ మెడల్ సాధించిన మొట్టమొదటి భారతీయ బాక్సర్ గా హితేష్ సంచలనం సృష్టించాడు. ఫైనల్ లో గాయం కారణంగా ప్రత్యర్థి ఇంగ్లాండ్ కు చెందిన ఒదెల్ కమరా వాకోవర్ ఇవ్వడంతో హితేష్ 70 కేజీల విభాగంలో విజేతగా నిలిచాడు. ఇక ఫైనల్ చేరిన మరో బాక్సర్ 65 కిలోల విభాగంలో అభినాష్ జమ్వాల్ సిల్వర్ తో సరిపెట్టుకున్నాడు. ఫైనల్ లో అతను బ్రెజిల్ కు చెందిన యుండిరి రీస్ చేతిలో ఓడిపోయాడు. మొత్తంగా ఈ వరల్డ్ బాక్సింగ్ కప్ లో భారత్ 6 మెడల్స్ సాధించింది. జదుమణి (50 కిలోలు), మనీష్ (55 కిలోలు), సచిన్ (60 కిలోలు), విశాల్ (90 కిలోలు) కాంస్య పతకాలు సాధించారు.

భారత క్రికెట్ జట్టు దిగ్గజాలు వీరేంద్ర సెహ్వాగ్, సచిన్ టెండూల్కర్, సౌరభ్ గంగూలీ, యువరాజ్ సింగ్‌ లతో మళ్లీ ఆడాలని ఉందని మరో దిగ్గజం భారత మాజీ కెప్టెన్ మహేంద్ర సింగ్ ధోనీ అన్నారు. తాజాగా ఓ పాడ్‌కాస్ట్‌లో ధోనీ పాల్గొనగా, ఆ సందర్భంలో ఎదురైన ప్రశ్నకు ఆయన ఆసక్తికర సమాధానం ఇచ్చారు. ధోనీ ప్రస్తుతం చెన్నై సూపర్ కింగ్స్ తరపున ఆడుతున్న విషయం తెలిసిందే. ఈ సందర్భంగా పలు విషయాలను ఆయన పంచుకున్నారు. తన మాజీ సహాచరులంతా కలిసి ఆడితే చూడడం బాగుంటుందని పేర్కొన్నారు. 2007 టీ20 ప్రపంచ కప్ సమయంలో ఇంగ్లాండ్‌ తో జరిగిన మ్యాచ్‌ ను ధోనీ గుర్తు చేసుకున్నారు. అప్పుడు యువరాజ్ సింగ్ బాదిన సిక్సర్లను గుర్తు చేస్తూ అందరు ఆటగాళ్లు తమ జీవితాల్లో మ్యాచ్ విన్నర్లేనని వ్యాఖ్యానించాడు. ఇక తన రిటైర్మెంట్ గురించి వస్తున్న వార్తలపై స్పందిస్తూ రిటైర్మెంట్ లేదని స్పష్టం చేశాడు.