Author: admin

పేదలకు సాయం అందించేందుకు వీలుగా ప్రభుత్వం పీ4 విధానం ద్వారా ప్లాట్‌ఫామ్ నిర్మిస్తుందని ఏపీ సీఎం చంద్రబాబు అన్నారు. ఉగాది రోజున ప్రారంభించే జీరో పావర్టీ – పీ4 విధానంపై నేడు సచివాలయంలో సమీక్ష నిర్వహించారు.మౌలిక వసతులు పెంచేందుకు గతంలో పీపీపీ విధానం తీసుకు వచ్చినట్లు కొత్తగా ఈనెలలోనే పీ4 అనే కొత్త విధానం తీసుకురానున్నాం. ఆర్థికంగా బాగున్న వారు సమాజానికి ఎంతో కొంత తోడ్పాటునందించాలి. పేదరికంలో ఉన్న 30 లక్షల కుటుంబాలను దత్తత తీసుకునే ఏర్పాట్లు చేస్తామని ఇటీవల సీఎం చంద్రబాబు అసెంబ్లీ వేదికగా పేర్కొన్న సంగతి తెలిసిందే. స్వతహాగా పైకిరాలేని పేదల జీవితాల్లో మార్పు తీసుకొస్తాం. పేదరికం లేని సమాజం తీసుకురావడమే లక్ష్యమని స్పష్టం చేశారు.

రుషికొండ బీచ్ లో బ్లూఫ్లాగ్ ను మంత్రి కందుల దుర్గేష్ ఎగురవేశారు. రుషికొండ బీచ్ కు మళ్లీ బ్లూఫ్లాగ్‌ సర్టిఫికేషన్‌ బీచ్ సౌందర్యం స్వచ్ఛతను కాపాడేలా కార్యక్రమాలుండాలని ఈసందర్భంగా మంత్రి దుర్గేష్ పేర్కొన్నారు. రాష్ట్రంలో బీచ్ పర్యాటకానికి మరింత ఊతమిచ్చే విధంగా ప్రభుత్వ చర్యలు ఉంటాయని అన్నారు. అంతర్జాతీయ పర్యాటకులను ఆకర్షించేలా తద్వారా పర్యాటకాభివృద్ధి, ఆదాయం పెంపొందించేందుకు కృషి చేస్తామని వివరించారు. భూములు అన్యాక్రాంతం అయితే చర్యలు కఠినంగా ఉంటాయని ఈసందర్భంగా మంత్రి దుర్గేష్ హెచ్చరించారు.బ్లూఫ్లాగ్ సర్టిఫికెట్ ను నిలబెట్టుకోవాలంటే ప్రజల భాగస్వామ్యం కూడా కీలకమని తెలిపారు. నిర్వహణ సామర్థ్యం పెంపొందించుకునేందుకు నాయకులు, అధికారులు, ప్రజలు సమైక్యంగా పనిచేయాలని పిలుపునిచ్చారు. బీచ్ పరిశుభ్రతకు పర్యాటకులు పూర్తిస్థాయిలో సహకరించాలని పిలుపునిచ్చారు.

టీటీడీ పాలకమండలి సమావేశంలో కీలక నిర్ణయాలు తీసుకున్నారు. సీఎం చంద్రబాబు నాయుడు అదేశాలకనుగుణంగా పలు కీలక‌ నిర్ణయాలు తీసుకున్నారు. టీటీడీ లో విధులు నిర్వహించేవారు హిందువులు మాత్రమే అయ్యిఉండాలన్న నిర్ణయానికి ప్రభుత్వం ఆమోదం తెలిపింది.ఏపీలోని పలు పట్టణాలు, గ్రామాల్లో అర్థాంతరంగా ఆగిపోయి ఉన్న ఆలయ నిర్మాణాలను పూర్తి చేయాలని నిర్ణయం.రూ.5258.68 కోట్లతో టీటీడీ వార్షిక బడ్జెట్‌కు ఆమోదం తెలిపింది.రాష్ట్రాల రాజధానుల్లో ఆలయాలు నిర్మించాలని నిర్ణయించింది. ఇతరదేశాల్లోనూ శ్రీవారి ఆలయాలు నిర్మించాలని నిర్ణయం తీసుకుంది. శ్రీవారి ఆస్తులు అన్యాక్రాంతం కాకుండా కమిటీ ఏర్పాటు. త్వరలో వీఐపీ బ్రేక్‌ దర్శన వేళల్లో మార్పులు తీసుకురానుంది.తిరుమలలో అనధికార హాకర్లపై చర్యలకు నిర్ణయం తీసుకుంది. సైన్స్‌ సిటీకి కేటాయించిన 20ఎకరాలు తిరిగి స్వాధీనం చేసుకోనుంది. రూ.26 కోట్లతో 1,500 గదులకు మరమ్మతులు చేపట్టనుంది. ముంతాజ్‌ హోటల్‌ అనుమతులు రద్దు చేసినట్లు బీఆర్‌ నాయుడు తెలిపారు.

కెరీర్ ఆరంభం నుండి పలు విభిన్న పాత్రలు చేస్తూ వైవిధ్యమైన కధా చిత్రాలతో ముందుకు సాగుతున్నారు మెగా ప్రిన్స్ వరుణ్ తేజ్. ఇటీవల ‘మట్కా’ తో ప్రేక్షకుల ముందుకు వచ్చారు. ఇక నేడు ఆయన కొత్త చిత్రానికి సంబంధించిన అప్డేట్ వచ్చేసింది. వరుణ్ తేజ్ 15వ చిత్రంగా తెరకెక్కనుంది. యువీ క్రియేషన్స్, ఫస్ట్ ఫ్రేమ్ ఎంటర్టైన్మెంట్స్ పతాకాలపై నిర్మితమవుతున్న ఈ చిత్రాన్ని మేర్లపాక గాంధీ తెరకెక్కిస్తున్నారు. థమన్ సంగీతాన్ని అందిస్తున్నాడు.రితికా నాయక్ వరుణ్ సరసన కథానాయికగా నటిస్తోంది. ఇండో-కొరియన్ హార్రర్ కామెడీ జానర్ లో ఇది రూపొందుతోంది. కాగా, నేడు ఈచిత్ర పూజా కార్యక్రమాలు జరుపుకుంది. దర్శకుడు క్రిష్ జాగర్లమూడి లావణ్య త్రిపాఠి, నిహారిక సహా పలువురు ప్రముఖులు ఈ కార్యక్రమంలో పాల్గొన్నారు.

పార్లమెంటు సభ్యులు, మాజీ సభ్యులకు కేంద్ర పార్లమెంటరీ వ్యవహారాల శాఖ శుభవార్త చెప్పింది. వారి జీతం, రోజువారీ భత్యం, పెన్షన్ లను పెంచుతూ నిర్ణయం తీసుకుంది. ఇప్పటివరకూ ఉన్న జీతాలను రూ. లక్ష నుండి రూ.1.24లక్షలకు పెంచింది. వారి జీతభత్యాలతో పాటు పెన్షన్, అదనపు పెన్షన్‌ ను కూడా పెంచుతూ నిర్ణయం తీసుకుంది. ఈ పెంపును 2023, ఏప్రిల్ 1 నుంచి అమల్లోకి తీసుకొస్తూ గెజిట్ నోటిఫికేషన్ జారీ చేసింది. లోక్‌సభ, రాజ్యసభ ఎంపీలకు నెల జీతం రూ. లక్ష నుంచి లక్షా 24 వేలకు, అలాగే వారికిచ్చే దినసరి భత్యాన్ని రూ. 2 వేల నుంచి రూ. 2, 500కు పెంచింది. మాజీ ఎంపీలకు పెన్షన్‌ను నెలకు రూ. 25 వేల నుంచి రూ.31 వేలకు సవరించింది. ఐదేళ్లకుపైగా ప్రతి అదనపు సంవత్సరానికి అదనపు పెన్షన్‌ను రూ.2 వేల నుండి రూ.2,500కు పెంచింది. చివరిగా 2018లో ఎంపీల జీతభత్యాలు పెంచింది.…

దేశీయ స్టాక్ మార్కెట్లు ఈ వారాన్ని భారీ లాభాలతో ఘనంగా ఆరంభించాయి. ముఖ్యంగా బ్యాంకింగ్ షేర్లు లాభాలతో సూచీల జోరును మరింత పెంచేశాయి. ఇన్వెస్టర్ల సంపదగా భావించే సెన్సెక్స్ లో నమోదిత కంపెనీల మార్కెట్ విలువ రూ.5 లక్షల కోట్ల మేర పెరిగి రూ.418లక్షల కోట్లకు చేరింది. నేషనల్ స్టాక్ ఎక్స్ చేంజ్ నిఫ్టీ మిడ్, స్మాల్ క్యాప్ సూచీలు కూడా 1% లాభాపడ్డాయి. ఇక నేటి ట్రేడింగ్ లో బాంబే స్టాక్ ఎక్స్ చేంజ్ సూచీ సెన్సెక్స్ 1078 పాయింట్లు లాభంతో 77,984 వద్ద స్థిరపడింది. నేషనల్ స్టాక్ ఎక్స్ చేంజ్ నిఫ్టీ 307 పాయింట్లు లాభపడి 23,658 వద్ద ట్రేడింగ్ ముగించింది. డాలర్ తో రూపాయి మారకం విలువ రూ.85.61గా కొనసాగుతోంది. టెక్ మహీంద్రా, ఎన్టీపీసీ, కోటక్ మహీంద్రా, ఎస్.బీ.ఐ, పవర్ గ్రిడ్ కార్పొరేషన్ షేర్లు ప్రధానంగా లాభపడ్డాయి.

సముద్రతీర ప్రాంతాల్లో నివసించే ప్రజలు అప్రమత్తంగా ఉండాలని సూపర్‌ స్టార్‌ రజనీకాంత్ విజ్ఞప్తి చేశారు.సముద్ర మార్గం ద్వారా ఉగ్రవాదులు దేశంలో చొరబడే అవకాశం ఉందని హెచ్చరిస్తూ,అనుమానాస్పద వ్యక్తుల కదలికలపై పోలీసులకు సమాచారం అందించాలని సూచించారు.26/11 ముంబై ఉగ్రదాడిని ఉదహరిస్తూ, సముద్ర మార్గం ద్వారా వచ్చిన ఉగ్రవాదులు 175 మందిని హతమర్చారని గుర్తుచేశారు.ప్రజల్లో అవగాహన కల్పించేందుకు 100 మంది సీఐఎస్ఎఫ్ జవాన్లు పశ్చిమ బెంగాల్ నుంచి కన్యాకుమారి వరకు 7,000 కిలోమీటర్ల సైకిల్ ప్రచార యాత్ర చేపట్టనున్నారని తెలిపారు.వారు మీ ప్రాంతానికి వచ్చేటప్పుడు స్వాగతించాలని, సాధ్యమైనంతవరకు వారికి సహకరించాలని రజనీకాంత్ కోరారు.

మహారాష్ట్ర డిప్యూటీ సీఎం ఏక్‌నాథ్ షిండేపై స్టాండప్ కమెడియన్ కునాల్ కమ్రా చేసిన స్కిట్ తీవ్ర వివాదాస్పదమైంది. షోలో భాగంగా షిండేను దేశద్రోహిగా పేర్కొంటూ ఓ పాట పాడటంతో మహా రాజకీయాలు వేడెక్కాయి. శివసేన నేతలు కమ్రాపై మండిపడుతున్నారు. సీఎం దేవేంద్ర ఫడ్నవీస్ ఈ ఘటనపై స్పందిస్తూ, హాస్యం పేరుతో ఇతరులను అగౌరవపరచడం తగదని హెచ్చరించారు. ఈ వ్యాఖ్యలపై క్షమాపణలు చెప్పాలని ఆయన కోరారు. షో జరిగిన హాబిటాట్ కామెడీ క్లబ్‌పై శివసేన కార్యకర్తలు దాడి చేశారు. పోలీసులు కొందరిని అదుపులోకి తీసుకున్నారు. డిప్యూటీ సీఎంపై అనుచిత వ్యాఖ్యలు చేసినందుకు కమ్రాపై కేసు నమోదైంది. తాజా పరిణామాల నేపథ్యంలో హాబిటాట్ స్టూడియో తమ క్లబ్‌ను మూసివేస్తున్నట్లు ప్రకటించింది.

ఇస్తాంబుల్ మేయర్ ఎక్రెమ్ ఇమమొగ్లును టర్కీ కోర్టు అరెస్ట్ చేయాలని ఆదేశించింది. అవినీతి ఆరోపణలపై విచారణ ముగిసే వరకు ఆయనను జైలులో ఉంచాలని తీర్పు ఇచ్చింది.ఎక్రెమ్ టర్కీ అధ్యక్షుడు రిసెప్ తయ్యిప్ ఎర్డోగాన్‌కు ప్రధాన రాజకీయ ప్రత్యర్థిగా నిలుస్తున్నారు.ఈ అరెస్టు దేశవ్యాప్తంగా తీవ్ర నిరసనలకు దారితీసింది.గత పదేళ్లలో టర్కీలో ఇంత భారీ స్థాయిలో ప్రజలు రోడ్లెక్కడం ఇదే తొలిసారి.అంతర్జాతీయ స్థాయిలో కూడా టర్కీ ప్రజాస్వామ్య పరిస్థితిపై ఆందోళనలు వ్యక్తమవుతున్నాయి.2028 అధ్యక్ష ఎన్నికల్లో ఎక్రెమ్‌ను అడ్డుకోవడమే లక్ష్యంగా ఈ చర్యలు తీసుకున్నారని విమర్శలు వెల్లువెత్తుతున్నాయి.

విశాఖపట్నం వేదికగా ఈరోజు రాత్రి 7.30 గంటలకు ఢిల్లీ క్యాపిటల్స్ (డీసీ) మరియు లక్నో సూపర్ జెయింట్స్ (ఎల్ఎస్‌జీ) తలపడనున్నాయి.మ్యాచ్ కోసం అన్ని ఏర్పాట్లు పూర్తయ్యాయి.స్టేడియం మరమ్మతులకు రూ. 40 కోట్ల ఖర్చుతో కొత్త ఎల్ఈడీ లైట్లు, 34 ఆడియన్స్ బాక్సులు ఏర్పాటు చేశారు.ఈ హైవోల్టేజ్ మ్యాచ్‌కు భద్రతా చర్యల్లో భాగంగా 1,700 మంది పోలీసులను మోహరించారు.ట్రాఫిక్ కట్టడికి మధ్యాహ్నం 2 గంటల నుంచి రాత్రి వరకు విశాఖలో కొన్ని మార్గాలకు ఆంక్షలు విధించారు. వాహనదారులు ట్రాఫిక్ మార్గదర్శకాలను పాటించాలని పోలీసులు కోరారు.విశాఖలోని ఏసీఏ-వీడీసీఏ స్టేడియం ఐపీఎల్ ఉత్సాహానికి సిద్ధంగా ఉంది.