Author: admin

ఇటీవలే ప్రతిష్టాత్మక ఐసీసీ ఛాంపియన్స్ ట్రోఫీ ముగిసింది. భారత్ విజేతగా నిలిచిన సంగతి తెలిసిందే. ఇక అనంతరం వివిధ దేశాల అత్యుత్తమ ఆటగాళ్లతో ఐసీసీ టీమ్ ను ప్రకటించింది. ఆరుగురు భారత ఆటగాళ్లకు అందులో స్థానం లభించింది. ఐసీసీ టీమ్: మిచెల్ శాంట్నర్ (కెప్టెన్) (న్యూజిలాండ్) రచిన్ రవీంద్ర (న్యూజిలాండ్) గ్లెన్ ఫిలిప్స్ (న్యూజిలాండ్) మాట్ హెన్రీ (న్యూజిలాండ్) విరాట్ కోహ్లీ (భారత్) శ్రేయాస్ అయ్యర్ (భారత్) కే.ఎల్.రాహుల్ (భారత్) వరుణ్ చక్రవర్తి (భారత్) మహ్మద్ షమీ (భారత్) అక్షర్ పటేల్ (భారత్) ఇబ్రహీం జాద్రాన్ (ఆఫ్ఘనిస్తాన్) అజ్మతుల్లా (ఆఫ్ఘనిస్తాన్).

విజయవాడలో ప్రఖ్యాత వైద్యులు నోరి దత్తాత్రేయుడు రచించిన ‘మంటాడ టు మన్‌హటన్’ పుస్తకావిష్కరణలో సీఎం చంద్రబాబు పాల్గొన్నారు. మనం తీసుకునే ఆహారమే మెడిసిన్ అని కిచెన్ ఫార్మసీ అని చంద్రబాబు ఈసందర్భంగా వ్యాఖ్యానించారు. క్యాన్సర్ వస్తే డాక్టర్ వైద్యం అందిస్తాడు రాకుండా చూసుకోవాల్సిన బాధ్యత మనపైనే ఉందని పేర్కొన్నారు. రానున్న 4 సంవత్సరాలలో 50 లక్షల ఎకరాలకు నేచురల్ ఫార్మింగ్ ను విస్తరించనున్నట్లు తెలిపారు. ఏపీని దీనికి చిరునామాగా మార్చుతామని తెలిపారు. బసవతారకం హాస్పిటల్ నేపథ్యాన్ని ఈసందర్భంగా గుర్తు చేసుకున్నారు. ప్రభుత్వ సలహాదారుగా నోరి దత్తాత్రేయుడును తీసుకుంటున్నట్లు తెలిపారు. ఇది పదవికాదని బాధ్యత అని వేలాదిమందిని క్యాన్సర్ బారిన పడకుండా నివారించే అవకాశం ఉంటుందని అన్నారు. అమరావతి లో క్యాన్సర్ హాస్పిటల్ ఏర్పాటు చేస్తున్నట్లు తెలిపారు. క్యాన్సర్ నుండి ప్రజలను కాపాడే విధంగా చర్యలు తీసుకుంటున్నట్లు తెలిపారు.

ఆంధ్రప్రదేశ్‌ రాష్ట్ర రాజధాని అమరావతి నిర్మాణానికి కేంద్ర ప్రభుత్వం నుండి పూర్తి సహకారం ఉంటుందని కేంద్ర ప్రభుత్వం స్పష్టం చేసింది. దానికి అనుగుణంగానే రాజధానికి రుణాలు సమకూర్చే వ్యవహారంలో సహాయ సహకారాలు అందిస్తోందని కేంద్ర ఆర్థిక శాఖ పేర్కొంది. అమరావతి నిర్మాణం కోసం వరల్డ్ బ్యాంకు, ఆసియా డెవలప్మెంట్ బ్యాంకు (ఏడీబీ)ల నుండి తీసుకునే రుణాలు ఏపీ అప్పుల పరిమితిలోకి రావని కేంద్ర ఆర్థిక శాఖ స్పష్టం చేసింది. ఇక అమరావతి నిర్మాణ పనులకు సంబంధించి ప్రభుత్వం శరవేగంగా అడుగులు వేస్తోంది. ఈనెల లోనే అమరావతి నిర్మాణ పనులు ప్రారంభం కానున్నాయి. సీఆర్డీఏ, ఏడీసీ ఇప్పటివరకు 62 పనులకు టెండర్లు పిలిచినట్లు తెలుస్తోంది. రూ.40 వేల కోట్ల విలువైన పనులకు కొనసాగుతున్న టెండర్ల ప్రక్రియ కొనసాగుతోంది.

భారత దేశంలోని పులుల జనాభాను సంరక్షించాలన్న లక్ష్యంతో కేంద్ర ప్రభుత్వం టైగర్ రిజర్వ్ లను నిర్వహిస్తోంది. తాజాగా మధ్యప్రదేశ్ లో చంబల్ ప్రాంతంలోని శివపురి జిల్లాలో ఉన్న మాధవ్ నేషనల్ పార్క్ ను మధ్యప్రదేశ్ లో 9వ టైగర్ రిజర్వ్, దేశంలో 58 వ టైగర్ రిజర్వ్ గా తాజాగా కేంద్రప్రభుత్వం ప్రకటించింది. వింధ్య పర్వతాలల్లో దాదాపు 355 చదరపు కిలోమీటర్ల విస్తీర్ణంలో ఈ నేషనల్ పార్క్ విస్తరించి ఉంది. 1958 సంవత్సరంలో నేషనల్ పార్క్ గా ప్రకటించారు. ఇప్పటివరకు మధ్యప్రదేశ్ లో వీరాంగన దుర్గావతి, కన్హా, సత్పురా, బాంధవఘర్, పెంచ్, సంజయ్ దుబ్రి, పన్నా, రతపాని టైగర్ రిజర్వ్(2024)లు ఉన్నాయి. తాజాగా ఈ ఏడాది మాధవ్ నేషనల్ పార్క్(2025) టైగర్ రిజర్వ్ గా గుర్తించారు. ఈ గుర్తింపుతో ఈ టైగర్ రిజర్వ్ లో పులులను సంరక్షించేందుకు ఎన్టీసీఏ నుంచి నిధులు కూడా లభిస్తాయి. ప్రపంచంలోని మొత్తం పులుల జనాభాలో 70%…

మంగళగిరి నియోజకవర్గ పరిధిలో ఉచిత ఎలక్ట్రికల్ బస్సు సేవలను నేడు ఏపీ విద్యా ఐటీ శాఖ మంత్రి నారా లోకేష్ ప్రారంభించారు. సుదూర ప్రాంతాల నుండి ఎయిమ్స్ హాస్పటల్, పానకాల లక్ష్మీనరసింహస్వామి ఆలయానికి వచ్చే ప్రజలు రాకపోకలకు ప్రజలు పడుతున్న ఇబ్బందులు మంత్రి లోకేష్ దృష్టికి రావడంతో ఆయన విజ్ఞప్తి మేరకు మెగా ఇంజనీరింగ్ సంస్థ సిఎస్ఆర్ నిధుల నుండి రూ.2.4 కోట్ల విలువైన రెండు ఒలెక్ట్రా బస్సులను ఉచితంగా అందించింది. ఈ బస్సుల్లో ఒకటి మంగళగిరి బస్టాండు నుండి ఎన్ఆర్ఐ జంక్షన్, డిజిపి ఆఫీసు మీదుగా ఎయిమ్స్ కు, మరొకటి మంగళగిరి బస్టాండు నుండి ఎన్ఆర్ఐ జంక్షన్ మీదుగా పానకాలస్వామి గుడివరకు ఉచితంగా ప్రజలకు సేవలు అందిస్తాయని లోకేష్ పేర్కొన్నారు.

దేశీయ స్టాక్ మార్కెట్లు నేటి ట్రేడింగ్ ను నష్టాలతో ముగించాయి. ఉదయం ఒక ప్రారంభమైన మార్కెట్లు ఇన్వెస్టర్లు ఆఖర్లో లాభాల స్వీకరణకు మొగ్గు చూపడంతో నష్టాలతో ముగించాయి. బాంబే స్టాక్ ఎక్స్ చేంజ్ సూచీ సెన్సెక్స్ 217 పాయింట్లు నష్టంతో 74,115 వద్ద స్థిరపడింది. నేషనల్ స్టాక్ ఎక్స్ చేంజ్ నిఫ్టీ 77 పాయింట్లు నష్టపోయి 22,460 వద్ద ట్రేడింగ్ ముగించింది. డాలర్ తో రూపాయి మారకం విలువ రూ.87.29 కొనసాగుతోంది. సెన్సెక్స్ లో హిందూస్తాన్ యూనీలివర్, ఇన్ఫోసిస్, పవర్ గ్రిడ్ కార్పొరేషన్, నెస్లే ఇండియా, ఏషియన్ పెయింట్స్ షేర్లు లాభాలతో ముగిశాయి.

గోపి చంద్ కధానాయకుడిగా కొత్త సినిమా ప్రకటన వచ్చేసింది. సంకల్ప్ రెడ్డి దర్శకత్వంలో తెరకెక్కుతున్న ఈచిత్రం నేడు పూజా కార్యక్రమాలు జరుపుకుంటోంది. భారీ బడ్జెట్ తో ఈచిత్రం రూపొందనుంది. ‘ఘాజీ’, ‘ఐబీ71’ వంటి విభిన్న కధాంశాలున్న చిత్రాలతో ఆకట్టుకున్న సంకల్ప్ రెడ్డి మరో అద్భుతమైన కథాంశంతో గోపి చంద్ 33వ చిత్రాన్ని రూపొందించనున్నారు. ఇండియన్ హిస్టరీలో కీలకమైన సంఘటనలతో ఈచిత్రం రానున్నట్లు గోపీచంద్ ఇప్పటివరకు కనిపించని పాత్రలో కనిపించనున్నారని చిత్ర బృందం తెలిపింది. శ్రీనివాస సిల్వర్ స్క్రీన్ బ్యానర్ పై శ్రీనివాస చిట్టూరి నిర్మిస్తున్నారు.త్వరలోనే ఇతర నటీనటులు సాంకేతిక నిపుణుల వివరాలు ప్రకటించనున్నారు.

ఆంధ్రప్రదేశ్ లో ఎమ్మెల్యే కోటా 5 ఎమ్మెల్సీ స్థానాలకు గాను పొత్తులో భాగంగా రెండు సీట్లు జనసేన, బీజేపీకి కేటాయించగా మిగిలిన 3 సీట్లకు టీడీపీ అభ్యర్థులను ప్రకటించిన సంగతి తెలిసిందే. మూడు ప్రాంతాల్లోంచి ఒక్కొక్కరిని ఎంపిక చేసింది.రాయలసీమలోని కర్నూలు జిల్లాకు చెందిన బీసీ సామాజికవర్గ నేత బీటీ నాయుడు, బీదా రవిచంద్ర, యువతను ప్రోత్సహించడం, మహిళలకు ప్రాధాన్యతను ఇచ్చే క్రమంలో శ్రీకాకుళానికి చెందిన మాజీ స్పీకర్ ప్రతిభా భారతి కుమార్తె కావలి గ్రీష్మకు టీడీపీ అవకాశం ఇచ్చింది. టీడీపీ నుంచి ఎమ్మెల్సీ అభ్యర్థులుగా ఎంపికైన ముగ్గురు నేతలూ నేడు నామినేషన్ దాఖలు చేశారు.

ఛత్తీస్‌గఢ్ ఆర్థిక మంత్రి ఒ.పి. చౌధరి చేసిన పని పలువురి దృష్టిని ఆకర్షిస్తోంది. స్వయంగా ఆయన చేతిరాతతోనే పూర్తి బడ్జెట్‌ను రూపొందించడం విశేషం. 2025-26 ఆర్థిక సంవత్సరం బడ్జెట్‌ను సుమారు రూ.1.65 లక్షల కోట్లతో ఆయన శాసనసభకు సమర్పించారు. మాములుగా బడ్జెట్ ప్రతులను అధికారులు కంప్యూటర్లతో రూపొందిస్తుంటారు. అయితే ఒ.పి. చౌధరి మాత్రం ఆయనే స్వయంగా బడ్జెట్‌ను స్వయంగా హిందీలో రాశారు. దీని కోసం దాదాపు నాలుగు రోజులపాటు రోజుకు గంట లేదా గంటన్నర మాత్రమే నిద్రపోయారని తెలిపారు. ప్రజలకు సేవ చేయాలనే సంకల్పంతో తాను ఐఏఎస్ అధికారిగా ఉద్యోగానికి రాజీనామా చేసి రాజకీయాల్లోకి వచ్చానని చౌధరి తెలిపారు. చేతితో రాసిన బడ్జెట్ పత్రం పారదర్శకతకు నిదర్శనమని ఆయన పేర్కొన్నారు. 2005 బ్యాచ్ ఐఏఎస్ అధికారి అయిన చౌధరి 2018లో బీజేపీలో చేరారు. 2023లో రాయ్ పూర్ నుండి గెలిచి మంత్రి పదవిని చేపట్టారు.

తిరుమల తిరుపతి దేవస్థానం ఆస్థాన గాయకుడు గరిమెళ్ళ బాలకృష్ణ ప్రసాద్ (76) కన్నుమూశారు. ఆయన మృతి పట్ల ఏపీ సీఎం చంద్రబాబు సంతాపం వ్యక్తం చేశారు. గరిమెళ్ళ బాలకృష్ణ ప్రసాద్ గారి మృతి నన్ను దిగ్భ్రాంతికి గురి చేసింది. 1978 నుండి 2006 వరకు టిటిడిలో ఆస్థాన గాయకుడిగా పనిచేసిన గరిమెళ్ళ 600 లకు పైగా అన్నమాచార్య సంకీర్తనలకు స్వరకల్పన చేసిన గొప్ప వ్యక్తి. సంప్రదాయ కర్ణాటక, జానపద, లలిత సంగీతంలోనూ ప్రావీణ్యత కలిగిన గరిమెళ్ల, తిరుమల శ్రీ వారి సేవలో తరించారు. తన మధుర గాత్రంతో శ్రీ వేంకటేశ్వరుని కృపా కటాక్షాలకు పాత్రుడయ్యారు.. అలాంటి మహనీయుడు మనల్ని వదిలి వెళ్ళడం బాధాకరం. ఆయన పవిత్ర ఆత్మకు శాంతి చేకూర్చాలని దేవుణ్ణి ప్రార్థిస్తున్నాను. ఆయన కుటుంబ సభ్యులకు ప్రగాఢ సానుభూతి తెలియజేస్తున్నాను అని సీఎం చంద్రబాబు సోషల్ మీడియా ‘ఎక్స్’ లో ట్వీట్ చేశారు.